اسرائیلی فورسز کی غزہ پر بمباری کا سلسلہ جاری ہے، متاثرہ عوام اس وقت بے یارومددگار ہیں، ایسے میں پاکستان نے مظلوم فلسطینی عوام کے لیے امداد کی پہلی کھیپ روانہ کر دی گئی ہے۔
فلسطین کے متاثرہ عوام کے لیے امدادی سامان کی کھیپ پاک فوج اور نیشنل ڈیزاسٹرمینجمنٹ اتھارٹی کی جانب سے روانہ کی گئی ہے۔ ’امدادی سامان کی کھیپ کو غزہ میں پہنچانے کے لیے پہلے مصر پہنچایا جائے گا‘۔
مزید پڑھیں
فلسطینی عوام کے لیے بھیجے گئے امدادی سامان میں موسم سرما کے لیے ایک ہزار خیمے، 4 ہزار کمبل اور 3 ٹن ادویات شامل ہیں۔
پاکستان کی جانب سے روانہ کی گئی امدادی کھیپ کے باعث متاثرین غزہ کو فوری ریلیف ملے گا۔
پاکستان نے اس عزم کا اعادہ کیا ہے کہ ہم مشکل کی اس گھڑی میں فلسطین کے مظلوم بہن بھائیوں کے ساتھ کھڑے ہیں۔
واضح رہے کہ اسرائیلی فوج اور فلسطین کی مزاحمتی تنظیم ’حماس‘ کے درمیان کشیدگی کے باعث پیداشدہ صورت حال کے بعد اسرائیلی فورسز کی جانب سے غزہ پر مسلسل گولہ باری کی جا رہی ہے۔
اسرائیلی فورسز کی جانب سے غزہ پر کی گئی بمباری میں اب تک 3 ہزار سے زیادہ فلسطینی شہید ہو چکے، اسرائیل کی جانب سے اسپتالوں اور پناہ گزینوں کے کمیپوں پر بھی گولہ باری کی جا رہی ہے۔
دوسری جانب اسرائیل نے بھی تصدیق کی ہے کہ ’حماس‘ اور حزب اللہ کے حملوں میں 2 ہزار اسرائیلی ہلاک ہو چکے ہیں۔
