بنوں کاؤنٹر ٹیررازم ڈیپارٹمنٹ (سی ٹی ڈی) اور لکی مروت پولیس کی مشترکہ کارروائی میں چھ دہشت گردوں کو ہلاک کر دیا گیا۔
لکی مروت پولیس کے ترجمان کے مطابق سی ٹی ڈی کی جانب سے یہ کارروائی ضلع لکی مروت میں ڈڈی والا تھانے کی حدود میں کی گئی۔
سی ٹی ڈی کو اطلاع ملی تھی کہ دہشت گرد پولیس چوکی پر حملہ کرنے کا منصوبہ بنا رہے ہیں۔
جیسے ہی پولیس اور سی ٹی ڈی اہلکار دہشت گردوں کے مشتبہ ٹھکانے پر پہنچے دہشت گردوں کی طرف سے فائرنگ شروع کردی گئی۔ فائرنگ کے تبادلے میں چھ دہشت گرد مارے گئے اور ان کے قبضے سے بھاری اسلحہ، گولہ بارود اور دستی بم برآمد کر لیے گئے۔
ہلاک ہونے والے چار دہشت گردوں کی شناخت ضیاء اللہ، صفات اللہ، محب اللہ، اور کلیم اللہ کے ناموں سے ہوئی جب کہ دو کی شناخت کا عمل جاری ہے۔
واضح رہے کہ نومبر میں اسی علاقے میں عسکریت پسندوں کی جانب سے لکی مروت میں پولیس وین پر فائرنگ کے نتیجے میں 6 پولیس اہلکار شہید ہوگئے تھے۔
