ترجمان اینٹی کرپشن نے کہا کہ چوہدری پرویز الٰہی کو راہداری ریمانڈ پر لاہور منتقل کر لیا گیا ہے، اینٹی کرپشن آج چوہدری پرویز الٰہی کو مجسٹریٹ کی عدالت میں جسمانی ریمانڈ کے لیے پیش کرے گا۔ چوہدری پرویز الٰہی کو اینٹی کرپشن نے گزشتہ روز اڈیالہ جیل سے تحویل میں لیا تھا۔
ترجمان اینٹی کرپشن کے مطابق اینٹی کرپشن نے حسب ضابطہ اے ٹی سی عدالت سے چوہدری پرویز الٰہی کا سفری ریمانڈ حاصل کیا۔ چوہدری پرویز الٰہی پنجاب اسمبلی میں غیر قانونی تقرریوں کے کیس میں نامزد ملزم ہیں۔ جبکہ مجسٹریٹ نے چوہدری پرویز الٰہی کے جسمانی ریمانڈ کی اینٹی کرپشن کی استدعا مسترد کر دی تھی۔
ترجمان اینٹی کرپشن کا کہنا ہے کہ مجسٹریٹ کے فیصلے کو اینٹی کرپشن نے ایڈیشنل سیشن جج کی عدالت میں چیلنج کیا۔ جس پر ایڈیشنل سیشن جج نے اینٹی کرپشن کی استدعا منظور کر لی۔ لیکن چوہدری پرویز الٰہی نے ایڈیشنل سیشن جج کے فیصلے کو ہائیکورٹ میں چیلنج کر لیا۔
مزید پڑھیں
ان کے مطابق چوہدری پرویز الٰہی کی ایڈیشنل سیشن جج کے فیصلے کے خلاف اپیل ہائیکورٹ نے مسترد کر دی تھی۔ ہائیکورٹ کے فیصلے کی روشنی میں اسپیشل جج اینٹی کرپشن نے چوہدری پرویز الٰہی کی ضمانت کا فیصلہ واپس لیا۔ جس کے بعد اینٹی کرپشن نے تمام قانونی تقاضے پورے کرکے چوہدری پرویز الٰہی کو اپنی تحویل میں لے لیا ہے۔
آج اینٹی کرپشن مجسٹریٹ کی عدالت میں چوہدری پرویز الٰہی کے جسمانی ریمانڈ کی دوبارہ استدعا کریگا۔ ترجمان اینٹی کرپشن نے بتایا کہ پنجاب اسمبلی میں غیر قانونی تقرریوں کا اوپن اینڈ شٹ کیس ہے۔ چوہدری پرویز الٰہی اور دیگر ملزمان نے خلاف ضابطہ تقرریاں کیں جس پر کرپٹ اور بدعنوان عناصر کے خلاف اینٹی کرپشن کی کارروائیاں جاری رہیں گی۔
