سندھ پولیس نے ڈیجیٹلائزیشن کی جانب بڑھتے ہوئے ملازمین کی سہولت کے لیے ’ای شیٹ ڈیجیٹل ایپ‘ متعارف کرا دی ہے
انسپکٹر جنرل (آئی جی) سندھ رفعت مختار کے مطابق محکمہ نے موبائل ڈیجیٹیلائزیشن کی طرف پہلا قدم بڑھادیا ہے، جس کے تحت پولیس ملازمین کے لیے پہلی ’ایپ‘ لانچ کر دی گئی ہے جب کہ سافٹ ویئر کی لانچنگ آئندہ ہفتے ہو گی، پہلے مرحلے میں پولیس کے سائوتھ زون اور سیکیورٹی ڈویژن کو رسائی دی جائے گی۔
آئی جی سندھ کے مطابق ایپ کے ذریعے ملازمین اپنی سروس کے متعلق تمام معلومات کا خود مشاہدہ کرسکیں گے جب کہ ٹرانسفر پوسٹنگ ، ترقی ، تنزلی تربیتی کورسز ، شوکاز نوٹسز اور دیگر ریکارڈ بھی دیکھا جاسکے گا۔
آئی جی سندھ نے بتایا ہے کہ ملازمین کی سہولت کے لیے ڈیجیٹل ایپلیکیشن انگریزی کے ساتھ ساتھ اردو اور سندھی زبان میں بھی کام کرے گی، یہ اقدام سندھ پولیس کا ڈیجیٹلائزیشن کی جانب بڑھتا ہوا پہلا اہم قدم ہے۔
واضح رہے کہ اس سے قبل شہریوں کی سولہت کے لیے سندھ پولیس نے ’تلاش‘ کے نام سے ایپ کا اجرا کیا تھا۔ جدید ٹیکنالوجی کی مدد سے انسداد جرائم کو یقینی بنانے اور حقیقی معنوں میں جرائم پیشہ عناصر کو شکست دینے کے ضمن میں اس ایپ کو ایک مؤثر اور بہترین ہتھیار کے طور پر استعمال کیا جا رہا ہے۔