پاکستان کسٹمز انفورسمنٹ اور میری ٹائم سیکیورٹی ایجنسی نے مشترکہ کارروائی کے دوران کروڑوں روپے مالیت کی شراب اسمگل کرنے کی کوشش ناکام بنا دی۔
وی نیوز کے مطابق کلکٹریٹ آف کسٹمز انفورسمنٹ کراچی کی اینٹی اسمگلنگ آرگنائزیشن کو خفیہ اطلاع ملی تھی کہ بذریعہ سمندر کروڑوں روپے مالیت کی شراب اسمگل کرنے کی کوشش کی جا رہی ہے۔
اطلاع ملنے پر پاکستان کسٹمز انفورسمنٹ نے میری ٹائم سیکیورٹی ایجنسی کے تعاون سے کھلے سمندر میں مشترکہ کامیاب کارروائی کرتے ہوئے ایک کشتی سے غیر ملکی شراب کی اٹھائیس ہزار بوتلیں برآمد کر لیں۔
ضبط کی گئی شراب کی مالیت چالیس کروڑ روپے بتائی جا رہی ہے۔
قانون نافذ کرنے والے متعلقہ ادارے نے برآمد شدہ شراب کی بوتلیں تحویل میں لینے کے علاوہ اسمگلنگ کے لیے استعمال ہونے والی کشتی بھی ضبط کرلی ہے۔ جب کہ کشتی پر سوار 7 افراد کے خلاف کسٹمز ایکٹ کے تحت مقدمہ درج کر کے انہیں باضابطہ گرفتار کر لیا ہے۔
ضبط شدہ شراب اینٹی اسمگلنگ آرگنائزیشن کے گودام منتقل کر دی گئی ہے۔
