راولپنڈی اور گردونواح میں غیر قانونی طورپر بسنت کے دوران میں ڈور پھرنے اور فائرنگ کے واقعات میں بچی سمیت 3افراد جاں جبکہ 50سے زائد زخمی ہوگئے، زخمیوں میں 2پولیس اہلکار بھی شامل ہیں۔
گزشتہ روز راولپنڈی کے مختلف علاقوں میں غیر قانونی طور پر بسنت کا تہوار منایا گیا ۔ راولپنڈی کے علاقے ڈھوک کھبہ کے علاقے میں فائرنگ سے نوجوان ارحم اور موہن پورہ میں میں بچی جاں بحق ہوئی جبکہ نوجوان وقاص گلے پر ڈور پھرنے سے جان کی بازی ہار گیا ۔
پولیس کے مطابق ڈور پھرنے سے 17 اور ہوائی فائرنگ سے 9 افراد زخمی ہوئے جبکہ چھت سے گرنے کے واقعات میں 40کے قریب شہری زخمی ہوئے ، پولیس کی جانب سے 100سے زائد مقدمات بھی درج کیے گئے۔
دوسری جانب نگران وزیراعلیٰ پنجاب محسن نقوی نے پتنگ بازی اور فائرنگ کے واقعات پر شدید برہمی کا اظہار کرتے ہوئے کمشنر راولپنڈی سے رپورٹ طلب کرلی ہے۔
اس موقع پر ناقص کارکردگی دکھانے پر2 ڈی ایس پی اور3 ایس ایچ او کو معطل کردیا گیا۔
