سنیتا مارشل پاکستان کی ان اداکاراؤں میں سے ہیں جنہوں نے صرف ڈرامہ انڈسٹری ہی میں نہیں بلکہ ماڈلنگ میں بھی کامیابی سمیٹی ہے۔ سنیتا کو پاکستانی ڈرامہ انڈسٹری کا حصہ بنے ہوئے ایک دہائی سے زیادہ عرصہ ہوگیا ہے، ان کی شادی بھی انڈسٹری ہی کے ایک ستارے حسن احمد سے ہوئی ہے، اس جوڑی کے 3 بچے ہیں۔
سنیتا اور حسن خوشگوار ازدواجی زندگی گزار رہے ہیں اور دونوں نے کچھ ڈراموں میں ایک ساتھ بھی کام کیا ہے، جن میں سے ایک اب تک کا ٹاپ ٹرینڈنگ ڈرامہ ’بے بی باجی‘ ہے۔
’بے بی باجی‘ میں سنیتا اور حسن نے ایک شادی شدہ جوڑے کا مرکزی کردار ادا کیا ہے جو دیکھنے والوں کو بہت پسند آیا کیوں کہ دونوں میاں بیوی ماہر اداکار ہیں۔
مومن ثاقب کے پروگرام، ’حد کردی‘ میں ایک انٹرویو کے دوران جب مومن ثاقب نے سنیتا مارشل سے پوچھا کہ وہ دوبارہ اپنے شوہر کے ساتھ کام کرنا چاہیں گی یا نہیں؟ انہوں نے کہا کہ ان دونوں کا ’بے بی باجی‘ پر تجربہ بہت اچھا رہا، لیکن کبھی کبھی حسن کو ان کے کردار سے الگ کرنا مشکل ہو جاتا تھا۔
سنیتا نے بتایا کہ جب ان دونوں نے کام شروع کیا تھا تو رومینٹک ڈائیلاگ بولتے ہوئے دونوں کو تھوڑا عجیب سا لگتا تھا اور انہیں ہنسی بھی آتی تھی۔ لیکن اب دونوں اس کیفیت سے کافی آگے نکل آئے ہیں۔
انہوں نے مداحوں کو یہ بھی بتایا کہ حسن اور وہ ایک ڈرامے میں دوبارہ اسکرین پہ نظر آئیں گے، لیکن دونوں میاں بیوی کا کردار ادا نہیں کر رہے بلکہ صرف ایک ساتھ کام کر رہے ہیں۔
واضح رہے کہ سنیتا مارشل کے کچھ مشہور ترین ڈراموں میں ’میرا سائیں‘، ’خدا اور محبت‘ اور ’قید تنہائی‘ شامل ہیں۔
