معروف کینیڈین گلوکار ڈریک نے بھی غزہ میں جنگ بندی کا مطالبہ کر دیا ہے۔
غزہ میں اسرائیل کے مظالم پرمعروف گلوکار ڈریک نے اپنی خاموشی توڑتے ہوئے غزہ میں جنگ بندی کا مطالبہ کیا ہے۔ ڈریک سمیت متعدد فنکاروں نے امریکی صدرجو بائیڈن کو لکھے گئے کھلے خط پر دستخط کیے ہیں جس میں غزہ میں جنگ بندی کا مطالبہ کیا گیا ہے۔ یہ خط آرٹسٹ4 سیز فائر(Artists4Ceasefire) پر پوسٹ کیا گیا تھا جس میں 7 اکتوبر سے جاری اسرائیل فلسطین تنازعہ ختم کرنے کا مطالبہ کیا گیا ہے۔
خط میں کہا گیا ہے کہ ‘گزشتہ 12 دن میں غزہ پر 6000 بم گرائے گئے ہیں، جس کے نتیجے میں ہر 15 منٹ میں ایک بچہ ہلاک ہو رہا ہے۔
خط میں مؤقف اختیار کیا گیا ہے کہ ‘ہم فنکار اور وکلا کے طور پر اکٹھے ہوئے ہیں، لیکن سب سے اہم بات یہ ہے کہ انسانی جانوں کے تباہ کن نقصان اور اسرائیل اور فلسطین میں ہونے والی ہولناکیوں کو دیکھ رہے ہیں، ہم امریکا کے صدر اور امریکی کانگریس سے مطالبہ کرتے ہیں کہ قبل اس کے کہ غزہ میں ایک اور جان چلی جائے، وہ حماس اور اسرائیل کے درمیان کشیدگی میں کمی اور فوری جنگ بندی کا مطالبہ کریں۔‘
خط میں کہا گیا ہے کہ ’پچھلے ڈیڑھ ہفتے میں 5,000 سے زیادہ لوگ مارے جا چکے ہیں، اس کا اندازہ ہر باضمیر انسان کو ہے کہ یہ تباہ کن ہے، ہمارا ماننا ہے کہ ہر جان قیمتی ہے، چاہے اس کا تعلق کسی بھی مذہب یا نسل سے ہو اور ہم فلسطینی اور اسرائیلی شہریوں کے قتل کی مذمت کرتے ہیں۔‘
گلوکاروں اور اداکاروں نے خط میں کہا ہے کہ ’ہم آپ کی انتظامیہ، کانگریس اور تمام عالمی رہنماؤں سے درخواست کرتے ہیں کہ وہ مقدس سرزمین میں تمام زندگیوں کا احترام کریں اور بلا تاخیر جنگ بندی کا مطالبہ کریں اور اس میں سہولت فراہم کریں، غزہ پر بمباری روکی جائے اور یرغمالیوں کو بحفاظت رہا کروایا جائے۔ ‘
View this post on Instagram
خط کے مطابق غزہ کے 20 لاکھ باشندوں میں سے نصف بچے اور 2 تہائی سے زیادہ پناہ گزین ہیں، لوگ اپنے گھر چھوڑنے پر مجبور ہیں، لوگوں تک انسانی امداد پہنچنے کی اجازت ہونی چاہیے۔‘
اس خط پر ڈریک کے علاوہ ہالی وڈ کے وکٹوریہ مونیٹ، جینیفر لوپیز، میکلمور، ٹیسا تھامسن، مارک روفالو، جورڈن پیل، امینی، کیٹرانڈا، بیلی، کیہلانی، بیلا حدید، کوئٹا برنسن، کلر مائیک سمیت متعدد اداکاروں نے دستخط کیے ہیں۔
میوزک پروڈیوسر نوح کا کہنا ہے کہ فلسطینیوں اور اسرائیلیوں میں دوستیاں بھی ہیں، اس انتہا پسندی نے لوگوں کے درمیان مزید فاصلہ پیدا کر دیا ہے، یہودیوں کے ساتھ ہولوکاسٹ میں جب یہ سب ہو رہا تھا تو پوری دنیا چپ تھی اور آج فلسطینیوں کے ساتھ بھی وہی ہو رہا ہے اور دنیا پھر سے چپ ہے۔
