سابق وزیر اعظم شاہد خاقان عباسی کاکہنا ہے کہ اسٹیبلشمنٹ کے لیے باکردار لوگوں کی نسبت کرپٹ لوگ زیادہ قابل قبول ہیں، پاکستان میں آئین تو موجود ہے لیکن اس کی بالادستی قائم کرنا بھی ضروری ہے،۔
لاہور لٹریچر فیسٹیول سے سے خطاب کرتے ہوئے شاہد خاقان عباسی کا کہنا تھا کہ ہمارے مسائل کا حل اسٹیبلشمنٹ کے پاس نہیں ہے کیونکہ اسٹیبلشمنٹ تو خود پاکستان کے لیے ایک مسئلہ ہے، سیاست پر عدلیہ اور اسٹیبلشمنٹ اثر انداز ہوتے ہیں لیکن اب سب کو مل کر آئین اورقانون کی بالادستی یقینی بنانا ہو گی۔
انہوں نے کہا کہ ملک کے سیاسی نظام میں چیلنجز کا مقابلہ کرنے کی صلاحیت نہیں ہے، بیوروکریسی میں بھی متعلقہ وزارتوں کے مسائل حل کرنے کی اہلیت نہیں،یہ فیصلہ عوام کو کرنا ہے کہ پارلیمنٹ میں کسے ہونا چاہیے مگر ایسا ہوتا نہیں ہے، 50 فیصد سینیٹرز نشستیں خرید کر سینیٹ میں پہنچتے ہیں۔
سابق وزیر اعظم نے کہا کہ پاکستان میں آئین تو موجود ہے لیکن اس کی بالادستی قائم کرنا بھی ضروری ہے، ملکی سیاسی تاریخ میں صرف 4 لیڈرز ذوالفقار علی بھٹو، نواز شریف، بے نظیر بھٹو اور عمران خان آئے ہیں، اسٹیبلشمنٹ سمیت سبھی کو سیاسی معاملات حل کرانا ہوں گے، تا خیر ملکی مفادمیں نہیں۔
ملک نے ہزاروں جنرلز، ججز، بیوروکریٹس پیدا کیے لیکن سیاسی لیڈر صرف ذوالفقار علی بھٹو، نواز شریف، بے نظیر بھٹو اور عمران خان ہیں۔ ہماری سیاست میں بیرونی عوامل کا عمل دخل ہے۔ وہ لوگ اسمبلیوں میں ہیں جنہیں عوام دیکھنا نہیں چاہتے، وہ اسٹیبلشمنٹ کو خوش کر کے اس جگہ پر ہیں: شاہد خاقان pic.twitter.com/gqp6BXyFHt
— Dunya News (@DunyaNews) February 25, 2023
