پاکستان کرکٹ ٹیم کے کپتان بابر اعظم ان دنوں آئی سی سی مینز کرکٹ ورلڈ 2023 میں شرکت کے لیے بھارت میں موجود ہیں۔ گزشتہ کئی روز سے بھارتی میڈیا کی جانب سے قومی کرکٹ ٹیم کے کپتان کے حوالے سے دعوٰی کیا جا رہا ہے کہ بابر اعظم نے اپنی شادی کے لیے بھارت کے معروف سلیبریٹی فیشن ڈیزائنر ‘سبیاساچی’ کی شیروانی خریدی ہے جس کی مالیت 7 لاکھ بھارتی روپے ہے۔
اس کے علاوہ بھارتی میڈیا کا یہ بھی کہنا تھا کہ بابر نے اس اہم ٹورنامنٹ کے دوران ناصرف شیروانی بلکہ شادی کے لیے جیولری بھی خریدی ہے جب کہ کرکٹر کی شادی رواں برس کے آخر میں دسمبر میں ہوگی۔
کھلاڑیوں کے ایجنٹ کے طور پر کام کرنے والی پی آر کمپنی سایا کارپوریشن نے ان خبروں کی تردید کرتے ہوئےانہیں من گھڑت قرار دیا ہے۔
ایکس پر جاری بیان میں سایا کارپوریشن کا کہنا ہے کہ بابراعظم کی بھارت میں شیروانی اور زیورات کی خریداری کی خبریں من گھڑت اور بے بنیاد ہیں، یہ خبریں خود بابر اعظم کے لیے بھی حیران کُن ہیں۔
We vehemently reject the utterly false reports circulating on certain media platforms suggesting that Kaptaan Babar Azam engaged in clothing and jewelry shopping in India amidst the ongoing World Cup.
This news comes as a surprise to him as well.
We categorically refute these…
— Saya Corporation (@SayaCorps) November 6, 2023
انہوں نے اس حوالے سے چلنے والی تمام خبروں کی تردید کرتے ہوئے کہا کہ میڈیا کو غلط خبریں اور من گھڑت پروپیگنڈا کرنے سے پہلے زمہ داری کا مظاہرہ کرتے ہوئے حقائق جانچ لینے چاہیے ہیں۔
سایا کارپوریشن کے اس بیان کو بابر اعظم نے اپنے آفیشل ایکس اکاؤنٹ سے ’ری پوسٹ‘ بھی کیا ہے۔
یاد رہے کہ کچھ ماہ قبل خبریں سامنے آئی تھیں کہ بابر اعظم ورلڈکپ کے بعد اپنی کزن سے رشتہ ازدواج میں منسلک ہوجائیں گے لیکن بعدازاں کرکٹر سمیت ان کے والد اور مینیجر نے ان خبروں کی تردید کردی تھی۔