خیبر پختونخوا میں اب اسلحہ لائسنس گھر بیٹھے بنوایا جا سکے گا جس کے لیے صوبائی حکومت نے ’دستک‘ نامی آن لائن ایپ متعارف کردی ہے۔
محکمہ داخلہ کے پی کے مطابق عوام کی سہولت کے لیے صوبے بھر میں اسلحہ لائسنس کے حصول کے لیے اس آن لائن سسٹم متعارف کرا دیا گیا ہے جس کے تحت صارفین آن لائن ادائیگی کے بدلے اسلحہ لائسنس کی سہولت حاصل کر سکیں گے۔
محکمہ داخلہ اورقبائلی امور خیبر پختو نخوا نے اسلحہ لائسنس کے حصول میں سہولت فراہم کرنے کے لیے نیا آرم لائسنسنگ سافٹ ویئر تیار کیا ہے جس کے باعث اب عام لوگوں کو پورے خیبر پختونخوا میں کسی بھی ای پیمنٹ کے ذریعے آن لائن درخواست دینے اور لائسنس پروسیسنگ فیس کی ادائیگی کی سہولت حاصل ہوگی۔
محکمہ داخلہ کے مطابق آرمز لائسنس کے حصول کے پیچیدہ عمل کو سہل کرنے کے لیے ڈیزائن کیا گیا ہے تاکہ ڈیٹا سیکیورٹی اور ریگولیٹری تعمیل کے اعلیٰ ترین معیارات کو برقرار رکھتے ہوئے بنا کسی رکاوٹ صارف کو آسانی فراہم کی جاسکے۔
اسلحہ لائسنس کی آن لائن پروسیسنگ کے لیے مذکورہ ایپلی کییشن گوگل پلے اسٹور پر دستیاب ہے۔ محکمے کا کہنا ہے کہ ایپ ڈاؤن لوڈ کرکے پروفائل بنا کر ضروری معلومات جمع کرانے کے بعد اسلحہ لائسنس کے لیے درخواست دی جاسکتی ہے۔
محکمے کا مزید کہنا ہے کہ اس سے عوام کو آسانی ہوگی اور لائسنس کے لیے سرکاری دفاتر کے چکر نیہں لگانے پڑیں گے جبکہ درخواست کے حوالے معلومات بھی حاصل کی جاسکے گی۔ محکمہ داخلہ کے مطابق ایپ کے باعث لائنس کے اجرا کے عمل میں شفافیت ائے گی اور میرٹ پر کام ہو گا۔
