سابق وزیر اعظم اور مسلم لیگ ن کے قائد میاں نواز شریف 2 روزہ دورے کے موقع پر کوئٹہ پہنچ گئے۔
کوئٹہ میں میاں محمد نواز شریف مختلف سیاسی رہنماؤں سے ملاقاتیں کریں گے۔
نواز شریف کی نجی ہوٹل میں آمد پر ہوٹل کے باہر کارکنان کی بڑی تعداد موجود تھی جو اپنے لیڈر کے حق میں نعرے لگا رہی تھی۔
سابق وزیر اعظم کے ہمراہ مسلم لیگ ن کے صدر اور سابق وزیراعظم شہباز شریف اور پارٹی کی چیف آرگنائزر مریم نواز بھی تھیں۔
ہوٹل پہنچنے پر نوازشریف سے صحافیوں نے سوالات کرنے کی کوشش کی تاہم سابق وزیراعظم نے کسی سوال کا جواب نہیں دیا۔
جام کمال آج مسلم لیگ ن میں شامل ہوں گے
سابق وزیراعلیٰ جام کمال نواز شریف سے ملاقات کے لیے نجی ہوٹل پہنچ گئے، اس موقع پر ایک صحافی نے سوال کیا ’آج آپ مسلم لیگ ن میں شمولیت اختیار کررہے ہیں؟‘ جام کمال کا کہنا تھا’ جی ! آج میاں صاحب سے ملاقات ہے، 6 بجے باقاعدہ اعلان کریں گے‘۔
جام کمال کا کہنا تھا ’کوشش ہے ایک بہتر ٹیم بنا کر بلوچستان کو آگے لے کر جائیں، بہت عرصے سے مختلف سیاسی جماعتوں سے رابطے تھے، بلوچستان میں مسلم لیگ ن کو دوبارہ فعال کرنے کا کریڈٹ جعفر خان مندوخیل کو جاتا ہے‘۔
انہوں نے کہا کہ بلوچستان کے لوگوں کو ہمیشہ امید رہی ہے کہ وفاقی جماعتیں صوبے کی طرف توجہ دیں، اب امید ہے کہ معاملات بہتری کی طرف جائیں گے۔
