بھارتی کرکٹ ٹیم کے بیٹسمین شبھمن گل خصوصاً خواتین مداحوں میں کافی مقبول ہیں لیکن ابھی تک یہ واضح نہیں کہ ہندوستانی کرکٹر کس کو ڈیٹ کر رہے ہیں۔
جب بھارت کے معروف اداکار سیف علی خان اور ان کی سابق اہلیہ امرتا سنگھ کی صاحبزادی اور اداکارہ سارہ علی خان نے ‘کافی ود کرن’ میں شبھمن گل کے ساتھ افیئر پر کرن جوہر کے سوال کا جواب دیا تو کرکٹر کے ریلیشن شپ اسٹیٹس کا انکشاف ہوگیا۔ ان دنوں ایسی خبریں گردش کررہی ہیں کہ وہ لیجنڈ کرکٹر سچن ٹنڈولکر کی بیٹی سارہ ٹنڈولکر کو پسند کرتے ہیں۔
کرکٹ ورلڈ کپ 2023 کے دوران ٹنڈولکر کی بیٹی سارہ ٹنڈولکر کا سوشل میڈیا پر کافی چرچا ہورہا تھا اور انہیں شبھمن گل سے ایک بار پھر منسوب کیا جا رہا تھا۔
بھارتی میڈیا کے مطابق ایسی کئی رپورٹس ہیں جن میں دعویٰ کیا گیا ہے کہ سارہ ٹنڈولکر اور شبھمن گل ایک دوسرے سے محبت کرتے ہیں جبکہ کئی مشہور شخصیات نے بھی اس کا اشارہ دیا ہے۔
سارہ علی خان نے بھی ‘کافی ود کرن’ میں اس کی تصدیق کی۔ جب سارہ سے شبھمن گل کے ساتھ ان کے افیئر کے بارے میں پوچھا گیا تو اداکارہ نے کہا کہ وہ دوسری سارہ ہیں جنہیں کرکٹر پسند کرتے ہیں۔
انہوں نے کہا کہ ‘ساری دنیا غلط سارہ کے پیچھے ہے’۔ اس کا مطلب ہے کہ اداکارہ سارہ نہیں ہیں جن پر شبھمن گل فدا ہیں۔
مداحوں پر یہ بات کافی حد تک واضح ہو گئی کہ شبھمن گل سچن ٹنڈولکر کی بیٹی سارہ ٹنڈولکر کو ڈیٹ کر رہے ہیں۔ ان دونوں کی تصاویر سوشل میڈیا پر وائرل ہیں حالانکہ نہ تو سارہ ٹنڈولکر اور نہ ہی شبھمن گل نے اس پر کوئی ردعمل ظاہر کیا ہے۔
ان دنوں شبھمن گل کا ایک پرانا انٹرویو بھی سوشل میڈیا پر وائرل ہو رہا ہے۔ انٹرویو میں جب ان سے پوچھا گیا کہ کیا وہ سارہ ٹنڈولکر کو ڈیٹ کر رہے ہیں تو انہوں نے کہا ‘شاید’۔ قابل ذکر بات یہ ہے کہ سارہ ٹنڈولکر ورلڈ کپ کے کئی میچوں میں موجود رہی تھیں۔
واضح رہے کہ کچھ عرصہ قبل بھی 24 سالہ شبھمن گل اور 26 سالہ سارہ ٹنڈولکر کی ایک تصویر سوشل میڈیا پر وائرل ہو رہی تھی تاہم بعد میں وہ جعلی ثابت ہوئی تھی کیوں کہ وہ درحقیقت سارہ ٹنڈولکر اور ان کے بھائی ارجن ٹنڈولکر کی ایک ساتھ کھنچوائی گئی تصویر تھی جسے ٹیکنالوجی کی مدد سے ٹیمپر کیا گیا تھا۔
