آفیشل سیکریٹ ایکٹ خصوصی عدالت نے آج سائفر کیس کی سماعت کا تحریری حکمنامہ جاری کر دیا جس کے مطابق چیئرمین پاکستان تحریک انصاف (پی ٹی آئی) عمران خان اور وائس چیئرمین شاہ محمود قریشی کو 28 نومبر کو جیل سے عدالت میں پیش ہونے کا حکم دے دیا۔
ہائیکورٹ ڈویژن بنچ کے 21 نومبر کے فیصلے کا متعلقہ پیراگراف عدالتی حکم کا حصہ بناتے ہوئے عدالت نے لکھا کہ آج پراسیکیوشن کے گواہوں کے بیان ریکارڈ کرنے کے لیے کیس مقرر تھا۔
ہائیکورٹ کے فیصلے کے بعد عدالت 29 اگست سے کارروائی آگے بڑھائے گی اس لیے حاضری کے لیے عمران خان اور شاہ محمود قریشی کو 28 نومبر کو جیل سے عدالت پیش کیا جائے۔
مزید پڑھیں
واضح رہے گزشتہ روز سپریم کورٹ نے چیئرمین پی ٹی آئی عمران خان کی سائفر کیس میں فرد جرم عائد کیے جانے کیخلاف اپیل پر ان کے وکیل حامد خان کی استدعا منظور کرتے ہوئے سماعت غیر معینہ مدت کے لیے ملتوی کر دی ہے۔
سماعت شروع ہوئی تو چیئرمین پی ٹی آئی عمران خان کے وکیل حامد خان نے عدالت سے التوا مانگ لیا، ان کا کہنا تھا کہ اسلام آباد ہائیکورٹ نے انٹرا کورٹ اپیل پر فیصلہ دیا ہے، جس کا جائزہ لینا چاہتا ہوں۔
اس سے قبل چیئرمین پی ٹی آئی عمران خان کی بہن علیمہ خان نے بھی کہا تھا کہ انہیں کوئی اُمید نہیں ہے کہ چیئرمین پی ٹی آئی سائفر کیس سے باہر آئیں گے۔ فیصلہ کیا ہوا ہے کہ چیئرمین پی ٹی آئی کو جیل سے نہیں نکالنا۔
گزشتہ روز لاہور میں انسدادِ دہشت گردی عدالت کے باہر میڈیا سے گفتگو کرتے ہوئے علیمہ خان کا کہنا تھا کہ عمران خان لیڈر ہیں اور وہی پی ٹی آئی کے چیئرمین ہیں۔ جیل میں رہے یا باہر وہ ہی لیڈر ہیں۔
ان کا کہنا تھا کہ عدالتی نظام انہیں سپورٹ کر رہا ہے، ہمیں عدلیہ اور ججز سے ناامید نہیں ہونا چاہیے۔ اسلام آباد ہائیکورٹ نے بڑا زبردست فیصلہ دیا کہ جیل ٹرائل نہیں ہونا چاہیے۔
