اسلام اباد ہائیکورٹ نے سابق وزیر اعظم عمران خان کی توشہ خانہ کیس میں الیکشن کمیشن کے فیصلے کیخلاف مرکزی اپیل واپس لینے کی درخواست پر آئندہ ہفتے فیصلہ سنانے کا عندیہ دے دیا ہے۔
اسلام آباد ہائیکورٹ کے چیف جسٹس عامر فاروق نے چیئرمین پی ٹی آئی کی 21 اکتوبر 2022 کے الیکشن کمیشن کے فیصلے کیخلاف مرکزی اپیل واپس لینے کی متفرق درخواست پر اعتراضات کیساتھ سماعت کی۔ چیئرمین پی ٹی آئی کے وکیل بیرسٹر گوہر عدالت میں پیش ہوئے۔
متفرق درخواست میں موقف اپنایا گیا تھا کہ 18 جنوری کو اپیل واپس لینے کے لیے متفرق درخواست دائر کی گئی، 13 ستمبر کو عدالت نے فریقین کے دلائل کے بعد فیصلہ محفوظ کیا جو 2 ماہ 10 دن سے نہیں سنایا گیا۔
بیرسٹر گوہر کو مخاطب کرتے ہوئے جسٹس عامر فاروق نے کہا کہ یاد دہانی کے لیے بہت شکریہ، بہت سارے معاملات ایک ساتھ چل رہے ہیں، آئندہ ہفتے آپ کی درخواست پر فیصلہ کر دیں گے۔
21 اکتوبر 2022 کو الیکشن کمیشن کی جانب سے توشہ خانہ کیس میں چیئرمین پی ٹی آئی کو نااہل قرار دیا تھا اور ان کے خلاف فوجداری کارروائی کے لیے مقامی عدالت سے رجوع کرنے کا حکم دیا تھا۔
چیئرمین پی ٹی آئی نے الیکشن کمیشن کا فیصلہ اسلام آباد ہائی کورٹ میں چیلنج کر رکھا تھا۔ بعد ازاں چیئرمین پی ٹی آئی کی جانب سے اسلام آباد ہائیکورٹ میں مرکزی اپیل واپس لینے کی درخواست دائر کرتے ہوئے موقف اپنایا گیا تھا کہ اسلام آباد ہائیکورٹ کے بجائے لاہور ہائیکورٹ میں اپیل دائر کرنا چاہتے ہیں۔
