وزیر اعلیٰ پنجاب مریم نواز شریف کے وژن کے تحت سڑکوں پر محفوظ سفر کو یقینی بنانے کے لئے مناواں ٹریفک پولیس لائنز میں پاکستان کا اپنی نوعیت کا پہلا ہیوی وہیکلز ڈرائیونگ ٹریننگ سکول قائم کیا جا رہا ہے۔
آئی جی پنجاب ڈاکٹر عثمان انور نے مناواں ٹریفک لائنز میں زیر تعمیر اس ڈرائیونگ سکول کا دورہ کیا اور سینئیر افسران کے ساتھ میٹنگ کی۔
اس موقع پر سی ٹی او لاہور ڈاکٹر اطہر وحید، ڈی آئی جی ٹریفک پنجاب وقاص نذیر، ڈی آئی جی ایس پی یو غازی صلاح الدین اور سی اے او سیف سٹیز ایس ایس پی عمارہ اطہر بھی موجود تھے۔
نئے ڈرائیونگ ٹریننگ سکول میں بس، ٹرک اور دیگر ہیوی وہیکلز کے ڈرائیورز کو جدید سیمولیٹرز اور جدید ٹیکنالوجی کے ذریعے ڈرائیونگ کی تربیت دی جائے گی۔
مسافر بسوں، ہیوی وہیکلز اور گڈز ٹرانسپورٹ ڈرائیورز کی سرٹیفائیڈ تربیت کے ذریعے سڑکوں پر حادثات میں کمی لانے کا امکان بڑھ جائے گا۔
ڈرائیورز کو لیکچرز، عملی ڈرائیونگ ٹریننگ اور ٹریفک قوانین سے آگاہی کے بعد ٹیسٹ کے ذریعے سرٹیفیکیٹس جاری کیے جائیں گے۔ اس کے علاوہ مناواں ٹریفک پولیس لائنز میں جدید سہولیات سے مزین نیا لائسنسنگ سنٹر بھی قائم کیا جا رہا ہے۔
آئی جی پنجاب ڈاکٹر عثمان انور نے مناواں ٹریفک لائنز میں مختلف شعبوں کا وزٹ کیا اور سی ٹی او لاہور کی جانب سے بریفنگ بھی حاصل کی۔ انہوں نے ایم ٹی سیکشن تکامل سنٹر اور ڈرائیونگ سکول کا بھی جائزہ لیا۔
