عمران خان کا توشہ خانہ کیس میں سزا معطلی کے لیے دوبارہ سپریم کورٹ سے رجوع

پاکستان تحریک انصاف کے بانی عمران خان نے توشہ خانہ کیس میں ٹرائل کورٹ کا فیصلہ معطل کرنے کے لیے دوبارہ سپریم کورٹ سے رجوع کر لیا۔

بانی پی ٹی آئی کے وکلا نے رجسٹرار آفس کے اعتراضات ختم کرکے دوبارہ اپیل دائر کر دی اور ٹرائل کورٹ کا فیصلہ معطل کرنے کی استدعا کی گئی ہے۔

اپیل میں موقف اختیار کیا گیا ہے کہ سابق وزیراعظم بڑی سیاسی جماعت کے قائد ہیں، ان کے انتخابات میں حصہ لینے کے لیے ضروری ہے کہ ٹرائل کورٹ کا فیصلہ معطل کیا جائے۔

اپیل کے مطابق اسلام آباد ہائیکورٹ نے سزا معطل نیں کی، عدالت العالیہ کی غلطی کا فائدہ اٹھا کر الیکشن کمیشن نے نااہلی کا نوٹیفکیشن جاری کیا ہے۔

واضح رہے کہ اس سے قبل 23 دسمبر کو عمران خان نے سپریم کورٹ میں سزا معطلی کی درخواست دائر کی تھی مگر رجسٹرار آفس نے اعتراض عائد کردیا تھا۔

گزشتہ دنوں نیب نے اڈیالہ جیل میں قید سابق وزیر اعظم اور سابق خاتون اوّل کے خلاف ایک اور توشہ خانہ ریفرنس دائر کیا تھا جس کے نکات بھی سامنے آئے تھے۔

نیب پراسیکیوٹر نے احتساب عدالت میں تفتیشی افسر محسن ہارون اور کیس افسر وقار الحسن کے ہمراہ ریفرنس دائر کیا تھا۔ عدالت کے رجسٹرار آفس نے ریفرنس کی جانچ پڑتال شروع کی تھی۔

ریفرنس کے مطابق وزارت عظمیٰ کے دوران بانی پی ٹی آئی اور بشریٰ بی بی کو 108 تحائف ملے جن میں سے 58 تحائف ملزمان نے رکھ لیے تھے۔