وی نیوز اسلام آباد میں ہزارہ یونیورسٹی مانسہرہ اور انٹرنیشنل اسلامک یونیورسٹی اسلام آباد کے میڈیا اسٹڈیز کے طلبہ و طالبات کی 2 ماہ کی انٹرن شپ مکمل ہونے پر سرٹیفکیٹس تقسیم کرنے کی تقریب منعقد ہوئی۔
تقریب میں میڈیا میٹرز فار ڈیموکریسی کی بانی صدف خان، پاکستان ٹی وی ڈیجیٹل کے ایڈیٹر ثاقب تنویر، نیشنل پریس کلب کی نائب صدر اور انڈیپینڈنٹ اردو کی سینیئر سوشل میڈیا پروڈیوسر سحرش قریشی، ورلڈ ایکو کے عرفان غوری، اے بی این نیوز کی اینکر پرسن منیبہ اختر، اب تک نیوز کی بیورو چیف راشدہ سیال، پاکستان کنیکٹ سے لیلیٰ طارق، پاکستان ٹی وی کی مہ نور قریشی اور پی ٹی وی کی سلمیٰ کوثر نے شرکت کی۔
مہمان مقررین نے انٹرن شپ مکمل کرنے والے طلبہ سے میڈیا انڈسٹری میں کام کے تجربات شیئر کیے اور صحافت کے مختلف شعبوں، عملی تقاضوں اور پیشہ ورانہ مہارتوں کے حوالے سے گفتگو کی۔ انہوں نے طلبہ کے سوالات کے بھی تفصیلی جوابات دیے اور انہیں عملی صحافت میں بہتر مواقع حاصل کرنے کے لیے اپنی صلاحیتیں نکھارنے کی ترغیب دی۔
تقریب کے دوران صحافیوں اور میڈیا سے وابستہ شخصیات نے وی نیوز کے چیف ایڈیٹر عمار مسعود کو صحافتی خدمات کے اعتراف میں تمغہ امتیاز ملنے پر مبارکباد دی اور اس خوشی میں کیک بھی کاٹا۔
تقریب کے اختتام پر چیف ایڈیٹر وی نیوز عمار مسعود نے تمام مہمانوں کی شرکت پر شکریہ ادا کیا۔ انہوں نے کہا کہ وی نیوز پاکستانی صحافت میں مثبت کردار ادا کرنے کے ساتھ ساتھ تعلیمی اداروں کے ساتھ تعاون اور شراکت داری کا سلسلہ جاری رکھے گا۔
عمار مسعود نے مہمانوں کو وی نیوز کے سووینئرز پیش کیے جبکہ انٹرن شپ مکمل کرنے والے طلبہ و طالبات میں سرٹیفکیٹس بھی تقسیم کیے گئے۔
