مرطوب حالات میں اگر زمین کے قریب ہوا کافی حد تک ٹھنڈی ہو جائے تو ہوا میں موجود بخارات پانی کی چھوٹی بوندوں میں بدل جاتے ہیں۔ یہ بوندیں سطح زمین پر مرئیت (چیزوں کو دیکھنے کی صلاحیت) کو کم کرتی ہیں، اس عمل کو دھند کہا جاتا ہے۔
ورلڈ میٹرولوجیکل آرگنائزیشن کے مطابق دھند اس وقت ہوتی ہے جب ہوا میں معلق پانی کی بوندوں کی وجہ سے حد نگاہ 1 کلومیٹر سے کم ہو جاتی ہے۔
پاکستان میں دسمبر سے فروری کے درمیان موسم سرما میں دھند عام ہے، اس سال بھی جہاں ملک بھر کے مختلف علاقوں میں اسموگ اور دھند کا راج ہے وہاں اسلام آباد میں بھی رواں سال شروع ہوتے ہی دھند نے ڈیرے جما لیے ہیں۔
شدید دھند کی وجہ سے جہاں شہریوں کو سڑک پر گاڑی چلاتے مشکلات پیش آتی ہیں، حادثات میں انسانی جانیں جاتی ہیں، ایئرپورٹس سے پروازیں منسوخ یا تاخیر کا شکار ہوجاتی ہیں، شہریوں کو اپنے اردگرد دیکھنے میں مشکل پیش آتی ہے، وہیں دھند سے آنکھوں میں انفیکشن اور دمے جیسی پھیلنے کا بھی خدشہ موجود رہتا ہے، ایسے میں ضروری ہے کہ شہری چند ضروری احتیاطی تدابیر اختیار کریں۔
احتیاطی تدابیر کیا ہیں؟
ہر مسئلے کا کوئی نہ کوئی حل ضرور ہوتا ہے، اسی طرح احتیاطی تدابیر اختیار کرکے دھند کے مضر اثرات سے محفوظ رہا جاسکتا ہے۔
دھند میں گھر سے باہر نکلنے سے اجتناب کریں، اگر گھر سے باہر نکلتے بھی ہیں تو ماسک پہن کر نکلیں۔
دھند میں موجود گیسوں سے آنکھوں میں انفیکشن ہوسکتا ہے، اس لیے چشمے پہن کر گھر سے باہر نکلیں، کانٹیکٹ لینس کی بجائے نظر کی عینک کو ترجیح دیں۔
مزید پڑھیں
زیادہ سے زیادہ پانی پئیں اور گرم چائے کا استعمال کریں۔
باہر سے گھر آنے کے بعد اپنے ہاتھ ، چہرے اور جسم کے کھلے حصوں کو صابن سے دھوئیں۔
گھروں کی کھڑکیاں اور دروازے بند رکھیں۔
گاڑی چلاتے ہوئے گاڑی کی رفتار دھیمی رکھیں اور حد نگاہ کم ہونے پر فوگ لائٹس کا استعمال کریں، ہیڈ لائٹ، بیک لائٹ آن کرنے کے ساتھ ساتھ اشارے بھی آن کرکے گاڑی چلائیں کیوں کہ ذرا سی بے احتیاطی سے آپ کی یا آپ کے پیاروں کی جان جا سکتی ہے۔
شدید دھند ہو جائے تو کسی ہوٹل یا پیٹرول پمپ پر رک جائیں۔ اگر سفر ناگزیر ہو تو دوران سفر اگلی پچھلی گاڑیوں میں محفوظ فاصلہ رکھیں اور دھند میں انتہائی ایمرجنسی کے علاوہ سڑک کے کنارے بھی گاڑی کھڑی نہ کریں۔
دھند میں گاڑی چلانے کے لیے گاڑی کے وائپر درست رکھیں اور شیشے صاف رکھیں۔
گاڑی چلاتے ہوئے ٹیپ ریکارڈ آن نہ کریں تاکہ ٹیپ ریکارڈ کی آوار آپ کا دھیان سڑک سے بھٹکا نہ دے۔
بازاروں، گلیوں یا سٹرکوں پر فالتو پھرنے سے گریز کریں، پیدل چلتے ہوئے ہمیشہ سڑک کے دائیں جانب پیدل چلیں۔ یادرکھیں کہ گاڑی سڑک کے بائیں جانب چلائی جاتی ہے، پیدل چلنے والے سڑک کے انتہائی دائیں جانب سڑک سے نیچے کچی جگہ یا فٹ پاتھ پر چلیں۔
پیدل چلنے والے اپنا رخ آنے والی ٹریفک کی طرف رکھیں تاکہ سامنے سے آنے والی گاڑیوں کو دیکھ کر اپنا بچاؤ کرسکیں اور سڑک پار کرنی ہو تو پہلے دائیں پھر بائیں دیکھ کر انتہائی احتیاط سے پار کریں۔ جہاں پیدل سڑک پار جانے کے لیے پُل موجود ہوتو پل سے ہی پار کریں۔
دھند میں گاڑی چلاتے ہوئے یا پیدل سفر کرتے وقت سگریٹ نوشی سے گریز کریں۔
