ٹیکساس: منجمد تالاب میں زندہ رہنے کے لیے مگرمچھ نے کیا طریقہ اپنایا؟

ٹیکساس کے ایک وائلڈ لائف ریسکیو سینٹر نے ایک مگرمچھ کی ویڈیو شیئر کی ہے جس میں ایسا طریقہ اپنایا کہ شدید ٹھنڈ سے بھی محفوظ رہے اور سانس لینے کے لیے اسے آکسیجن بھی ملتی رہے۔

ٹک ٹوک پر پوسٹ کی گئی اس ویڈیو میں بیومونٹ کے گیٹر کنٹری کے ایک مگرمچھ کو دکھایا گیا جس کا جسم برف کے نیچے دبا ہوا ہے لیکن اس کی تھوتھنی ایک چھوٹے سے سوراخ سے نکلی ہوئی ہے۔ اس نے برف میں سوراخ کرکے اپنی تھوتھنی باہر نکالی ہوئی تھی تاکہ وہ سانس لے سکے۔

گیٹر کنٹری کے مالک گیری سوراج ویڈیو میں بتاتے ہیں کہ مگرمچھ کی ئی حرکت بظاہر غیر معمولی لگتی ہے لیکن حقیقت یہ ہے کہ سرد خون والے جانوروں کے لیے سردیوں کے موسم میں ایسی پوزیشن اختیار کرنا ایک معمول کی بات ہے۔

منجمد درجہ حرارت میں مگرمچھ دیگر سرد خون والے جانوروں کی طرح بے حس و حرکت پڑے رہتے ہیں۔ گیری نے بتایا کہ مگرمچھ کا دل ایک منٹ میں 3 مرتبہ دھڑک رہا تھا۔ انہوں نے مزید کہا کہ ’یہ حیرت انگیز ہے، یہ وہ طریقہ ہے جس کے ذریعے مگرمچھ برف میں زندہ رہتے ہیں‘۔