اسلام آباد پولیس کی جانب سے پاکستان تحریک انصاف ( پی ٹی آئی) کا مرکزی سیکرٹریٹ سیل کردیا گیا، تھانہ کراچی کمپنی کے پولیس اہلکاروں نے مرکزی دفتر جانے والے راستے بند کردیے، اور دفتر کے اطراف بھاری نفری تعینات کردی گئی ہے۔
اسلام آباد کے سیکٹر جی ایٹ میں واقع پی ٹی آئی کے مرکزی سیکرٹریٹ آفس کو اسلام آباد پولیس کی جانب سے سیل کر دیا گیا ہے، تحریک انصاف نے آج پارٹی کا جنرل باڈی اجلاس طلب کر رکھا تھا۔ آج ہونے والے اجلاس سے قبل ہی پولیس نے سیکرٹریٹ آفس کو سیل کر دیا ہے۔
مزید پڑھیں
واضح رہے آج احتساب عدالت نے بانی چیئرمین تحریک انصاف عمران خان اور اہلیہ بشریٰ بی بی کو 14،14 سال قید بامشقت کی سزا سنائی ہے، دونوں ملزمان پر فی کس 78 کروڑ 70 لاکھ روپے جرمانہ بھی عائد کیا گیا ہے۔ تاہم دونوں ملزمان 10 سال کے لیے نا اہل بھی قرار دیے گئے ہیں۔
گزشتہ روز بھی سائفر کیس میں خصوصی عدالت نے آفیشل سیکریٹ ایکٹ کے تحت سابق وزیر اعظم عمران خان اور شاہ محمود قریشی کو 10 سال قید بامشقت کی سزا سنائی تھی۔ سابق وزیراعظم اور سابق وزیرخارجہ کو سزا خصوصی عدالت کے جج ابو الحسنات محمد ذوالقرنین نے سنائی۔
پاکستان تحریک انصاف کا اسلام آباد میں مرکزی سیکرٹریٹ انتظامیہ نے سیل کردیا، پولیس کی بھاری نفری دفتر کے باہر تعینات ، پی ٹی آئی نے آج جنرل باڈی کا اجلاس طلب کر رکھا تھا۔@PTIofficial @ZubairAlikhanUN#ImranKhanPTI #PTI #WENews pic.twitter.com/oRWl2Yf2Y0
— WE News (@WENewsPk) January 31, 2024
یاد رہے اسی حوالے سے آج تحریک انصاف کے مرکزی سیکرٹریٹ میں اجلاس طلب کیا گیا تھا، عمران خان کی سزا اور الیکشن کے حوالے سے تحریک انصاف کے سرکردہ رہنماؤں نے پارٹی کا اگلا لائحہ عمل طے کرنا تھا۔
