امریکی ریاست میری لینڈ میں وٹنری ڈاکٹرز اس وقت حیران رہ گئے جب انہوں نے تکلیف میں مبتلا ایک سانپ کا آپریشن کر کے اس کے پیٹ سے گاڑی کے گیئر شفٹ نوب کو نکالا، جسے سانپ نے شاہد انڈہ سمجھ کر نگل لیا تھا۔
میری لینڈ کے گیتھرسبرگ کے سیکنڈ چانس وائلڈ لائف سینٹر کے ڈاکٹرز کا کہنا ہے کہ ان کے پاس ایک ایسے سانپ کو لایا گیا، جس کے پیٹ میں ابتدائی طور پر کسی نا معلوم شے نے ایک بڑا ابھار پیدا کر دیا تھا اور اس کی وجہ سے سانپ کے پیٹ میں سوراخ ہوگیا تھا۔
گیتھرسبرگ کے سیکنڈ چانس وائلڈ لائف سینٹر سوشل میڈیا پر تصاویر سمیت ایک پوسٹ کی جس میں سانپ کے پیٹ سے نکلنے والا گاڑی گیئر شفٹ نوب دکھایا گیا ہے۔
وٹنری ڈاکٹرز کا کہنا ہے کہ سانپوں میں یہ بات عام ہےکیونکہ وہ اکثر گولف گیندوں کو مرغی کے تازہ انڈے سمجھ لیتے ہیں اور پھر انہیں نگل جاتے ہیں لیکن یہ گیئر شفٹ نوب سانپ کے پیٹ میں اتنی دیر تک پھنسی ہوئی تھی کہ اب سانپ کی جلد میں سوراخ ہو گیا تھا۔
ڈاکٹرز کا کہنا ہے کہ سرجری کے ذریعے سانپ کے پیٹ سے گیئر شفٹ نوب نکالا گیا۔ پوسٹ میں کہا گیا ہے کہ سانپ اب مکمل طور پر صحت یاب ہوگیا ہے اور اسے موسم بہار میں چھوڑ دیا جائے گا۔
