پاکستان سپر لیگ کے آٹھویں ایڈیشن کے کوالیفائر اور ایلی منیٹر کھیلنے والی ٹاپ فور ٹیموں کا فیصلہ ہو گیا۔پشاور زلمی اور اسلام آباد یونائیٹڈ کے خلاف میچ کا فیصلہ ہونے کے بعد پلے آف مرحلے کے لیے کوالیفائی کرنے والی ٹیموں کی پوزیشن واضح ہو گئی ہے۔
لاہور قلندرز پہلی، ملتان سلطانز دوسری، اسلام آباد یونائیٹڈ تیسری اور پشاور چوتھی پوزیشن پر موجود ہے۔15 مارچ کو ہونے والے پہلے کوالیفائر میچ میں لاہور قلندرز اور ملتان سلطانز کا مقابلہ ہو گا۔ کوالیفائر کی فاتح ٹیم براہ راست فائنل جبکہ ہارنے والی ٹیم ایلی منیٹر ٹو کھیلے گی۔
16 مارچ کو پہلا ایلی منیٹر میچ پشاور زلمی اور اسلام آباد یونائیٹڈ کے درمیان ہو گا۔ 17 مارچ کو کوالیفائر ہارنے والی ، پہلا ایلی منیٹر جیتنے والی ٹیم سے مقابلہ کرے گی۔19 مارچ کو ایلی منیٹر ٹو اور کوالیفائر کی فاتح ٹیم کے درمیان فائنل ہو گا۔
پاکستان سُپر لیگ 8 کی فاتح ٹیم کو کتنی انعامی رقم ملے گی؟
پاکستان کرکٹ بورڈ کے مطابق پی ایس ایل 8 جیتنے والی ٹیم کو 24 قیراط سونے سے بنی ٹرافی کے ساتھ 12 کروڑ روپے کی انعامی رقم بھی دی جائے گی۔ فائنل ہارنے والی ٹیم کو 4 کروڑ 80 لاکھ روپے کی رقم دی جائے گی۔
یاد رہے کہ پی ایس ایل 7 جیتنے والی ٹیم کو 8 کروڑ جب کہ فائنل ہارنے والی ٹیم کو 3 کروڑ 20 لاکھ روپے رقم دی گئی تھی۔
پی ایس ایل کی تمام 6 فرنچائز ٹرافی اپنے نام کر چکی ہیں
پاکستان سپر لیگ کے آٹھویں ایڈیشن کی افتتاحی تقریب 13 فروری کو ملتان میں ہوئی تھی جبکہ اسی روز پہلا میچ ملتان سلطانز اور لاہور قلندرز کے درمیان کھیلا گیا تھا۔ پی ایس ایل 8 کا فائنل میچ اور اختتامی تقریب 19 مارچ کو لاہور میں ہوگی۔
پی ایس ایل کی تمام 6 فرنچائز کم از کم ایک ایک بار پی ایس ایل ٹرافی اپنے نام کر چکی ہیں۔ اسلام آباد یونائیٹڈ نے 2016 اور 2018 میں ٹائٹل اپنے نام کیا تھا۔ پشاور زلمی نے 2017 اور کوئٹہ گلیڈی ایٹرز نے 2019 میں پی ایس ایل فائنل میں فتح حاصل کی تھی۔
کراچی کنگز نے 2020 میں لاہور قلندرز کو با آسانی شکست دے کر ٹرافی اپنے نام کی تھی۔ ملتان سلطانز نے 2021 میں اور 2022 میں لاہور قلندرز نے ٹرافی جیتی تھی۔
