مقبول اداکارہ حنا دلپزیر نے انکشاف کیا ہے کہ وہ اپنے مقبول ترین ڈرامے ’بلبلے‘ کے کردار ’مومو‘ کو کسی بھی دوسری جگہ پرفارم نہ کرنے کی پابند ہیں۔
حال ہی میں حنا دلپزیر نے نجی ٹی وی گرین انٹرٹینمنٹ کی رمضان ٹرانسمیشن میں شرکت کی جہاں انہوں نے اپنے کردار ’مومو‘ کے بارے میں کھل کر بات کی۔ انہوں نے تصدیق کی کہ ڈرامہ ’بلبلے‘ کی ٹیم کے ساتھ تحریری معاہدہ کیا گیا ہے کہ وہ اس بات کی پابند ہیں کہ نہ تو کسی ٹی وی شو، ڈرامے اور تھیٹر میں ’مومو‘ کا کردار ادا کریں گی اور نہ ہی کسی عوامی تقریب میں ایسا کر سکتی ہیں۔
خیال رہے کہ ’بُلبلے‘ کو ابتدائی طور پر 2009 میں نشر کیا گیا تھا۔ یہ ڈرامہ خاندانی کامیڈی کی وجہ سے اتنا مقبول ہوا کہ اس کے ایک سے زائد سیزن بنائے گئے۔
اداکارہ حنا دلپذیر عرف مومو نے انکشاف کیا تھا کہ بلبلے‘ میں مومو کا کردار صرف ایک ہی قسط کے لیے لکھا گیا تھا اور ان کو بطور مہمان اداکار اس ایک قسط میں بلایا گیا تھا۔ اس وقت تک ڈرامے کی تقریباً 25 اقساط آن ایئر جا چکی تھیں اور 26 ویں قسط میں انہیں آنا تھا، جب وہ قسط آن ایئر ہوگئی تو انہیں بتایا گیا کہ یہ کردار بھی ڈرامے کے مستقل کرداروں میں شامل ہوگیا ہے۔
اداکارہ کا کہنا تھا کہ 10 سال قبل جب مومو کے کردار کے لیے منتخب کیا گیا تو مجھے بالکل بھی اندازہ نہیں تھا کہ یہ کردار اتنا مقبول ہوگا کہ میری پہچان ہی بن جائے گا۔