امریکا کے سابق صدر ڈونلڈ ٹرمپ نے دعویٰ کیا ہے کہ وہ منگل 21 مارچ کونیویارک میں درج ہوئے ایک مجرمانہ کیس میں گرفتار ہوجائیں گے تاہم اس بات کی کسی سرکاری سطح پر تصدیق نہیں ہوسکی۔
دی گارجین کی رپورٹ کے مطابق ڈونلڈ ٹرمپ کا سوشل میڈیا پر کہنا ہے کہ انہیں فحش فلموں میں کام کرنے والی ایک اداکارہ اسٹورمی ڈینیئلز کو ایک راز افشا نہ کرنے کے عوض پیسے دینے کے الزام میں گرفتار کیا جائے گا۔
سال 2023 کے آغاز میں سابق امریکی صدر نے اپنے خلاف غیر قانونی ادائیگیوں، انتخابی مداخلت، جیسے معاملات پر فرد جرم عائد ہونے کی صورت میں اپنے حامیوں سے احتجاج کرنے کا مطالبہ کیا تھا۔
دریں اثنا نیویارک میں قانون نافذ کرنے والے اہلکار ٹرمپ پر فرد جرم عائد ہونے کی صورت میں حفاظتی تیاریوں میں مصروف ہیں۔
ٹرمپ نے سوشل میڈیا پر اس بارے میں کوئی تفصیلات فراہم نہیں کیں کہ وہ متوقع گرفتاری کے بارے میں کیسے جانتے ہیں۔ اپنے بیان میں ان کا کہنا تھا کہ ڈیموکریٹک امریکی صدر جو بائیڈن کے خلاف انتخابات میں ان کی شکست دھاندلی کا نتیجہ تھی۔ انہوں نے اپنے کارکنان اور چاہنے والوں سے یہ اپیل بھی کی کہ وہ احتجاج کریں اور ملک کو واپس حاصل کریں۔
یاد رہے کہ فروری 2021 میں ان کے متعدد انتہا پسند حامیوں نے جو بائیڈن کی کامیابی کے سرکاری اعلان کو روکنے کی ایک ناکام کوشش میں کانگریس پر حملہ کیا تھا۔ وائٹ ہاؤس چھوڑنے کے بعد سے ٹرمپ نے پام بیچ، فلوریڈا میں رہائش اختیار کی ہے جہاں وہ جون 1946 میں پیدا ہوئے تھےاور سنہ 2016 میں صدر کا الیکشن جیتا تھا۔
فلوریڈا میں پام بیچ ملک کے ریاستی اٹارنی ڈیوڈ آرونبرگ نے ہفتے کی صبح میڈیا کو بتایا تھا کہ اگر ٹرمپ پر نیویارک میں فرد جرم عائد کی گئی تو یہاں احتجاج ہو گا اور ممکنہ تشدد تشویشناک صورت اختیار کرسکتا ہے۔
