خصوصی سرمایہ کاری سہولت کونسل کے اقدامات، غیر ملکی سرمایہ کاری میں نمایاں اضافہ

خصوصی سرمایہ کاری سہولت کونسل کے تعاون سے پاکستان میں براہ راست غیر ملکی سرمایہ کاری کا حجم 311.2 ملین تک پہنچ گیا ہے۔

خصوصی سرمایہ کاری سہولت کونسل کے اقدامات کے باعث پاکستان میں غیر ملکی سرمایہ کاری میں نمایاں اضافہ دیکھنے میں آیا ہے، پاکستان میں براہ راست غیر ملکی سرمایہ کاری کا حجم گزشتہ مہینے 258.04ملین ڈالر رہا جو گزشتہ سال اس عرصہ کے دوران 169.91 ملین ڈالر تھا۔

اسی طرح مجموعی غیر ملکی سرمایہ کاری میں بھی واضح اضافہ ہوا ہے، جو گزشتہ سال کے 172.6 ملین ڈالر کے حجم سے بڑھ کر 311.2 ملین ڈالر تک پہنچ گیا ہے۔

براہ راست غیر ملکی سرمایہ کاری کے تعاون سے ترسیلات زر کی آمد و اخراج میں بھی نمایاں بہتری آئی ہے، جو بالترتیب 330.15 ملین ڈالر اور 72.11 ملین ڈالر ریکارڈ کی گئیں ہیں۔

براہ راست غیر ملکی سرمایہ کاری کا یہ مثبت رجحان ملکی معیشت پر بین الاقوامی سرمایہ کاروں کے اعتماد کی بحالی کا واضح ثبوت ہے، اخراج زر میں اضافہ اس وجہ سے دیکھنے میں آیا کہ غیر ملکی کمپنیوں کو اپنا منافع باہر لے جانے کی اجازت دی گئی جو دیرینہ حل طلب مسئلہ تھا۔

یاد رہے کہ ماضی میں غیر ملکی کمپنیوں کو اپنا منافع باہر لے جانے کی اجازت نہیں تھی جس کی وجہ ے وہ کمپنیاں پاکستان میں سرمایہ کاری سے کتراتی تھیں، براہ راست

غیر ملکی سرمایہ کاری کے لیے سازگار ماحول خصوصی سرمایہ کاری سہولت کونسل کی مرہون منت ہے۔

ایک قلیل عرصے میں خصوصی سرمایہ کاری سہولت کونسل کے زیر اثر اٹھائے گئے اقدامات کی بدولت پاکستان اقتصادی ترقی کی راہ پر گامزن ہوا ہے۔