معروف ٹی وی اینکر و سیاستدان ڈاکٹر عامر لیاقت حسین مرحوم کی نازیبا ویڈیوز وائرل کرنے کے کیس میں یوٹیوبر یاسر شامی نے خود کو عدالت کے سامنے سرینڈر کردیا تاہم ان کی ضمانت منظور کرلی گئی۔
مزید پڑھیں
کراچی سٹی کورٹس میں جوڈیشل مجسٹریٹ شرقی کے روبرو مرحوم ڈاکٹر عامر لیاقت حسین کی نازیبا ویڈیوز وائرل کرنے سے متعلق کیس کی سماعت ہوئی کیس کی مرکزی ملزمہ و عامر لیاقت کی بیوہ دانیہ شاہ عدالت میں پیش ہوئیں۔
عدالت نے یاسر شامی کی ضمانت منظور کرلی اور 25 لاکھ روپے کے مچلکے جمع کرانے کا حکم دے دیا۔ عدالت نے ملزم یاسر شامی کو ایف آئی اے کے سامنے پیش ہوکر بیان ریکارڈ کرانے کا بھی حکم دیا۔
وکیل سرکار کے مطابق عدالت نے کیس میں مسلسل غیر حاضر ہونے پر معروف یوٹیوبر یاسر شامی کے وارنٹ گرفتاری جاری کیے تھے۔
عدالت نے ملزم کو گرفتار کرکے پیش کرنے کا حکم دیا تھا لیکن بار بار طلبی کے باوجود ملزم یاسر شامی عدالت کے روبرو پیش نہیں ہورہے تھے۔
کیس میں گواہان کے بیانات قلم بند کیے جارہے ہیں۔ ملزمہ دانیہ شاہ ضمانت پر رہا ہیں۔ ملزمان کے خلاف ایف آئی اے سائبر کرائم سیل میں مقدمہ درج ہے۔
ملزمہ دانیہ شاہ کے وکیل لیاقت گبول نے وی نیوز کو بتایا کہ یہ کیس یاسر شامی کی وجہ سے التوا کا شکار تھا۔ لیاقت گبول ایڈوکیٹ نے ہی کیس کے اوائل میں عدالت کو بتایا تھا کہ اصل قصور وار یاسر شامی ہیں جن کی وجہ سے یہ معاملہ آگے بڑھا۔
لیاقت گبول کے مطابق کیس کی اگلی سماعت 23 مئی کو ہوگی اور اسی دن یاسر شامی کی ضمانت میں توثیق پر دلائل دیے جائیں گے۔ ان کا مزید کہنا تھا کہ چونکہ اس کیس میں ایک اور ملزم نے سرینڈر کردیا ہے اس لیے آج اس ملزم کو مقدمے کی نقول فراہم کردی گئی ہیں جبکہ آئندہ سماعت پر ترمیمی فرد جرم بھی عائد کردی جائے گی۔
