قائم مقام صدر اور وزیراعظم کا طلعت حسین کی وفات پر افسوس اور رنج کا اظہار

قائم مقام صدر مملکت سید یوسف رضا گیلانی اور وزیراعظم محمد شہباز شریف نے معروف فنکار طلعت حسین کے انتقال پر گہرے دکھ اور غم کا اظہار کیا ہے۔

قائم مقام صدر مملکت سید یوسف رضا گیلانی نے کہا ہے کہ مرحوم طلعت حسین کی فنون لطیفہ کے لیےگرانقدر خدمات کو ہمیشہ یاد رکھا جائے گا۔ اللّٰہ تعالیٰ مرحوم کے درجات بلند کرے اور سوگواران کو صبر جمیل عطا کرے۔

وزیراعظم محمد شہباز شریف نے اپنے پیغام میں کہا کہ طلعت حسین ایک لیجینڈ اداکار تھے جن کی ڈائیلاگ ڈیلیوری کا ایک زمانہ معترف تھا۔ طلعت حسین نے اپنی جاندار اداکاری کے فن سے دنیا بھر کے ڈرامہ اور فلم شائقین کے دلوں میں اپنی جگہ بنائی۔ پاکستان ٹیلی ویژن، تھیٹر فلم اور ریڈیو کے لیے ان کی خدمات کو ہمیشہ یاد رکھا جائے گا۔

وزیراعظم نے کہا کہ ان کی وفات سے جو خلا پیدا ہوا اسے کبھی پر نہیں کیا جاسکے گا۔ اللہ تعالیٰ مرحوم طلعت حسین کو جنت الفردوس میں اعلیٰ مقام عطا فرمائے۔