پشاور میں پاکستان تحریک انصاف کے رہنما اور سینیئر وکیل علی زمان نامعلوم افراد کے حملے میں زخمی ہو گئے۔
مزید پڑھیں
پولیس کے مطابق واقعہ رات گئے اس وقت پیش آیا جب علی زمان اپنی گاڑی میں جا رہے تھے۔ بتایا کہ میونسپل اسکول کے قریب پہلے ایک گاڑی نے علی زمان کی گاڑی کو ٹکر ماری اور جب وہ گاڑی سے اترے تو ان پر تیز دار آلے سے حملہ کیا گیا۔ جس کے باعث وہ زخمی ہوگئے، انہیں فوری طور پر لیڈی ریڈنگ اسپتال منتقل کر دیا گیا۔
پشاور پولیس کے اہلکار نے بتایا کہ علی زمان پر تیز دار آلے سے حملہ ہوا ہے، جس کے نتیجے میں ان کے جسم کے مختلف حصوں پر چوٹ لگی ہے۔ جبکہ پولیس واقعے کی تفتیش کر رہی ہے۔
لیڈی ریڈنگ اسپتال کے ترجمان محمد عاصم نے بتایا کہ علی زمان ایڈووکیٹ اس وقت ایل آر ایچ کے سرجیکل یونٹ میں داخل ہیں۔ انہیں ابتدائی طبی امداد کے بعد اس وارڈ میں شفٹ کیا گیا ہے۔ اور ان کا علاج جاری ہے۔
اسپتال ترجمان کے مطابق علی زمان کی حالت خطرے سے باہر ہے، ڈاکٹروں کے مطابق علی زمان ایڈووکیٹ پر تیز دھار آلے سے حملہ کیا گیا ہے۔
واقعے کے فوراً بعد پی ٹی آئی کے قائدین اور رہنما بڑی تعداد میں اسپتال پہنچ گئے۔ اسپتال میں موجود پی ٹی آئی کے ایک ورکر نے بتایا کہ علی زمان ایڈوکیٹ 9مئی کے کیسز میں فرنٹ لائن پر تھے۔ وہ کارکنان کے خلاف تمام کیسز کی پیروی کر رہے تھے، اور ایک روپیے فیس بھی نہیں لے رہے تھے۔
کارکن کے مطابق 9مئی کے بعد جب سب روپوش تھے تو علی زمان ہی کارکنان اور قائدین کی ضمانت اور کیسز میں ہر وقت عدالت کے سامنے کھڑے تھے۔ انہوں نے بتایا کہ حملے کے بعد کارکنان میں شدید غصہ پایا جاتا ہے۔
وزیر اعلیٰ علی امین گنڈاپور اسپتال پہنچ گئے
علی زمان ایڈووکیٹ پر حملے کے بعد وزیراعلیٰ خیبر پختونخواہ سردار علی امین گنڈہ پور کا ایل آر ایچ اسپتال پہنچ گئے، انہوں نے علی زمان کی عیادت کی، اورحملے کی مذمت کرتے ہوئے پولیس کو ملزمان کی فوری گرفتاری کی ہدایت کر دی۔
