وفاقی وزیر اطلاعات و نشریات عطااللہ تارڑ نے کہا ہے کہ آپریشن عزم استحکام پر کل جماعتی کانفرنس کے بارے میں اتحادیوں سے مشاورت جاری ہے، تمام سیاسی جماعتوں کو اے پی سی میں شرکت کی دعوت دی جائے گی، عمران خان کا بھی اس حوالے سے بیان سامنے آیا ہے، اللہ کرے وہ اس پر قائم رہیں۔
اسلام آباد میں پریس کانفرنس کرتے ہوئے انہوں نے کہاکہ وزیراعظم کا بیرون ملک دورہ کامیاب رہا، جس کے اچھے نتائج سامنے آئیں گے۔ انہوں نے پاکستان کا موقف بڑی دلیری سے دنیا کے سامنے رکھا۔
یہ بھی پڑھیں آپریشن عزم استحکام کے اصل مقاصد اور اہداف کیا ہیں؟
عطااللہ تارڑ نے کہاکہ وزیراعظم شہباز شریف نے ایس سی او میں فلسطین سے متعلق واضح اور دوٹوک موقف اپنایا، اور کہاکہ اسرائیل غزہ میں جنگی جرائم کا مرتکب ہورہا ہے۔
انہوں نے کہاکہ دوست ممالک پاکستان کے ساتھ دوطرفہ تجارت بڑھانا چاہتے ہیں، آنے والے دنوں میں روس کے ساتھ تعلقات بڑھیں گے، جبکہ حکومت سرمایہ کاروں کو سہولتیں دینے کے لیے پُرامید ہے۔
وزیر اطلاعات نے کہاکہ حکومتی اقدامات کی وجہ سے 3 لاکھ نئے افراد ٹیکس نیٹ میں آئے، جو لوگ ٹیکس دے سکتے ہیں انہیں فوری ٹیکس نیٹ میں لایا جائے گا۔ ایف بی آر کی ٹیجیٹائزیشن تیزی سے آگے بڑھی ہے۔
یہ بھی پڑھیں بجٹ میں ٹیکس کا ہدف آئی ایم ایف کے مطالبے پر مقرر کیا گیا، وزیرمملکت برائے خزانہ
ایک سوال کے جواب میں عطااللہ تارڑ نے کہاکہ اسلام آباد ہائیکورٹ نے رفاقت تنولی کیس کو ٹیک اپ کیا ہے۔ اسلام آباد پولیس اس میں شفاف تحقیقات کرے۔
انہوں نے کہاکہ ایک شخص کا بیٹا مر گیا اور پرچہ بھی نہیں ہوا جبکہ اسی شخص کی گرفتاری بھی ڈال دی گئی، اس معاملے میں انصاف ہونا چاہیے۔
