آسٹریلیا کے شہر سڈنی میں ایک شخص نے اپنے گھر کی بالکونی کرایہ پر لگا دی جس کا کرایہ سن کر لوگ حیران رہ گئے۔
غیرملکی میڈیا رپورٹس کے مطابق، سوشل میڈیا پلیٹ فارم فیس بک پر ایک عجیب اشتہار سامنے آیا جس میں مالک مکان نے ایک بالکونی کی تصویر شیئر کی اور اشتہار میں اس بالکونی کو ’سنی روم‘ قرار دیا۔
یہ بھی پڑھیں: کرائے داروں کا رابن ہڈ جو مکان مالکان کے لیے ڈراؤنا خواب بن گیا
تصویر میں دیکھا جاسکتا ہے کہ اپارٹمنٹ سے متصل یہ بالکونی کمرے کی طرز پر سجائی گئی ہے جس میں فرش پر قالین، ایک جانب شیشے کا سلائیڈنگ ڈور جبکہ باہر کی جانب بھی ایک شیشے کی دیوار تھی جس میں لگی کھڑکیوں کو ضرورت کے تحت کھول کر بھی باہر کا نظارہ کیا جاسکتا ہے۔
اس بالکونی میں ایک پلنگ بھی موجود ہے۔ یہ بالکونی ایک 2 بیڈروم اپارٹمنٹ سے منسلک تھی جسے مالک مکان الگ سے کرائے پر دینا چاہتا ہے جس کا کرایہ 1300 ڈالر ہفتہ ہے۔
یہ بھی پڑھیں: آسٹریلیا کی جانب سے اسٹوڈنٹ ویزا فیس میں آج سے حیران کن اضافہ، آخر وجہ کیا ہے؟
سوشل میڈیا صارفین نے بالکونی کے اشتہار پر دلچسپ تبصرے کیے ہیں۔ ایک صارف نے کہا کہ یہ نظارہ بہت زبردست ہے۔ ایک اور صارف نے تبصرہ کیا، ’گڈ لک، کیا تم پاگل ہو؟‘۔
واضح رہے کہ سڈنی سمیت آسٹریلیا کے بڑے شہروں میں رہائش ایک سنگین مسئلہ بن چکی ہے جس کا فائدہ اٹھا کر مکان مالکان منہ مانگے کرائے طلب کررہے ہیں۔ جون میں حاصل کردہ ڈیٹا کے مطابق، سڈنی میں درمیانے درجے کی رہائش کا کرایہ 750 ڈالر ہفتہ ہے۔
