کراچی کے علاقے جنجال گوٹھ میں پولیس کے کاؤنٹر ٹیررازم ڈیپارٹمنٹ یعنی سی ٹی ڈی کی جانب سے خفیہ اطلاع پر کارروائی کے نتیجے میں 2 ملزمان حراست میں لیے گئے ہیں، جن کے حوالے سے سی ٹی ڈی نے دعویٰ کیا ہے کہ ان دونوں ملزمان کا تعلق کالعدم تحریک طالبان پاکستان سے ہے۔
یہ بھی پڑھیں: پاکستان کے اندر دہشتگرد حملوں میں ٹی ٹی پی کے کردار سے متعلق اقوام متحدہ کی رپورٹ میں اہم انکشافات
ترجمان سی ٹی ڈی کے مطابق سہراب گوٹھ کے علاقے جنجال گوٹھ میں کالعدم تحریک طالبان یعنی ٹی ٹی پی کے کارندوں کی اطلاع پر سی ٹی ڈی اینٹی ٹیررزم فائنانس یونٹ نے ایک کاروائی کے دوران کالعدم تحریک طالبان پاکستان حافظ گل بہادرگروپ کے 2 کارندوں کو حراست میں لے لیا ہے۔
ملزمان ابوذر اور یعقوب محسود حال ہی میں فنڈز اکٹھا کرنے کی غرض سے کراچی آئے تھے اور پکڑے گئے، ملزمان کی تحویل سے ایک چندہ جمع کرنے کی رسید بک اور جمع کیے گئے 15000 ہزار روپے بھی ضبط کرتے ہوئے مقدمہ درج کرلیا گیا ہے۔
مزید پڑھیں: سلامتی کونسل ٹی ٹی پی کے دہشتگردوں کے خلاف کارروائی کے لیے طالبان حکومت پر زور دے، پاکستان کا مطالبہ
ابتدائی معلومات کے مطابق گرفتار ملزمان تحریک طالبان پاکستان کی افغانستان میں موجود قیادت سے سماجی رابطہ کی مختلف ویب سائیٹس کے ذریعہ براہ راست رابطہ تھا، ملزمان کراچی میں تحریک طالبان پاکستان کے لیے فنڈز جمع کرتے تھے۔
ترجمان سی ٹی ڈی کے مطابق اس وقت ملزمان سے تفتیش جاری ہے اور مزید تفتیش کے لیے عدالت سے ریمانڈ لیا جائے گا تاکہ دیگر ملزمان تک رسائی کے لیے گرفتار ملزموں سے مزید معلومات کا حصول ممکن بنایا جا سکے اور شواہد بھی اکٹھا کیے جاسکیں۔
