انسداد دہشتگردی عدالت نے پاکستان تحریک انصاف کے رہنما رؤف حسن کو ایک روزہ جسمانی ریمانڈ پر سی ٹی ڈی کے حوالے کردیا ہے، جبکہ پیکا ایکٹ عدالت نے پی ٹی آئی کے میڈیا کوآرڈینیٹر وقاص جنجوعہ کی ضمانت منظور کرتے ہوئے انہیں رہا کرنے کا حکم دیا ہے۔
اسلام آباد کی انسداد دہشتگردی عدالت میں پی ٹی آئی رہنما رؤف حسن کے کے خلاف بارودی مواد کیس کی سماعت اے ٹی سی جج طاہر عباس سپرا نے کی۔
یہ بھی پڑھیں: آرمی چیف ٹیپو سلطان کیسے بنے؟ رؤف حسن کی رہائی کیسے عمل میں آئی؟
دوران سماعت پراسیکیوٹر راجا نوید عدالت سے استدعا کی کہ رؤف حسن کا مزید 7 روزہ جسمانی ریمانڈ دیا جائے، پراسیکیوٹر نے مؤقف اپنایا کہ چھاپے مارے گئے لیکن بدقسمتی سے مزید ملزمان تک رسائی فی الحال حاصل نہیں ہ سکی، رؤف حسن سے ان کے ساتھی ملزمان کے نام معلوم کرنے ہیں، جس کے لیے ان کی کسٹڈی درکار ہے۔
کیل صفائی علی بخاری نے پراسیکیوٹر کی جانب سے رؤف حسن کا 7 روزہ جسمانی ریمانڈ مانگنے کی مخالفت کی اور کہا کہ رؤف حسن پر صرف ایما کی حد تک الزام ہے، برآمد تو کچھ نہیں ہوا، مدعی مقدمہ کا رؤف حسن کے خلاف بیان ہے تو سامنے لائیں، حیران ہوں روف حسن کا ریمانڈ چاہیےکیوں؟ سمجھ نہیں آرہی مجھے، اگر ریمانڈ نہیں بنتا تو کیس سے ڈسچارج کرنا چاہیے، ریمانڈ ہی دینا ضروری نہیں۔
یہ بھی پڑھیں: پیکا ایکٹ عدالت نے پی ٹی آئی رہنما رؤف حسن کو رہا کرنے کا حکم دے دیا
انسداد دہشتگردی عدالت نے رؤف حسن کا ایک روزہ جسمانی ریمانڈ منظور کرتے ہوئے انہیں سی ٹی ڈی کے حوالے کر دیا اور انہیں کل دوبارہ عدالت میں پیش کرنے کی ہدایت کی۔
پیکا ایکٹ عدالت کا پی ٹی آئی میڈیا کوآرڈینیٹر وقاص جنجوعہ کو رہا کرنے کا حکم
دوسری جانب پیکا ایکٹ عدالت اسلام آباد نے پی ٹی آئی کے میڈیا کوآرڈینیٹر وقاص جنجوعہ کی درخواست ضمانت منظور کرتے ہوئے انہیں رہا کرنے کا حکم دے دیا ہے،ڈیوٹی مجسٹریٹ عباس شاہ نے 50 ہزار روپے مچلکوں کے عوض ضمانت منظور کی، وقاص جنجوعہ پر دہشتگردی کی انفارمیشن بنانے، پھیلانے اور دھماکے کا الزام ہے۔
واضح رہے کہ گزشتہ ماہ اسلام آباد پولیس نے پی ٹی آئی سیکریٹریٹ پر چھاپا مار کر احمد وقاص جنجوعہ کو گرفتار کیا تھا، مزید یہ کہ ایف آئی اے نے ریاست مخالف پراپیگنڈے میں ملوث ہونے پر پی ٹی آئی رہنما رؤف حسن کو بھی گرفتار کیا تھا۔
