وزیراعظم پاکستان و صدر پاکستان مسلم لیگ ن محمد شہبازشریف نے ایک بار پر اپنا موقف دُہرایا ہے کہ موجودہ حالات میں فوری انتخابات ممکن نہیں ہیں۔
شہبازشریف کی زیر صدارت ہونے والے اجلاس میں ملک کی موجودہ سیاسی اور آئینی صورت حال پر تفصیلی گفت وشنید کی گئی اور اس دوران آئینی و قانونی ماہرین نے پیر کے روز سپریم کورٹ میں ہونے والی اہم سماعت کے حوالے سے بھی بریفنگ دی۔
وزیراعظم نے کہا کہ پاکستان کی معاشی صورتحال اس قابل نہیں ہے کہ ملک میں فوری الیکشن کرا دیے جائیں۔
شہبازشریف کی زیر صدارت ہونے والے اجلاس میں وفاقی وزیر قانون اعظم نذیر تارڑ ، ملک احمد خان ، منصور اعوان اور دیگر نے شرکت کی۔
دوسری جانب شہبازشریف نے مسلم لیگ ن کی پارلیمانی پارٹی کا اجلاس بھی پیر کی دوپہر کو طلب کر لیا ہے جس میں قومی اسمبلی کے اجلاس سے متعلق حکمت عملی پر تبادلہ خیال کیا جائے گا جبکہ وزیراعظم کی جانب سے اراکین کو سیاسی حکمت عملی پر بھی بریفنگ دی جائے گی۔
واضح رہے کہ سپریم کورٹ آف پاکستان کا 3 رکنی بینچ انتخابات التوا کیس کی سماعت کررہاہے اور پیر کے روز اس کی اہم سماعت ہوگی جبکہ چیف جسٹس عمر عطا بندیال نے ہفتہ کے روز ریمارکس دیے تھے کہ پیر کا سورج معاملات کے حل کی نوید لے کر طلوع ہوگا۔
