سپریم کورٹ کے قادیانیوں سے متعلق فیصلے کے خلاف اسلام آباد میں مشترکہ احتجاجی مظاہرہ کیا گیا جس میں ہزاروں افراد نے شرکت کی۔
عالمی مجلس تحفظ ختم نبوت کے زیر اہتمام ہونے والے مظاہرے کی قیادت مولانا قاضی عبدالرشید، مولانا قاضی مشتاق، مولانا ظہور احمد علوی، مولانا نذیر فاروقی، مولانا ڈاکٹر عتیق الرحمان، مولانا آدم خان، مولانا عبدالغفار، مفتی عبدالسلام، مولانا طیب فاروقی، صاحبزادہ عتیق الرحمان، مولانا عبدالقدوس محمدی اور دیگر کررہے تھے۔
یہ بھی پڑھیں قادیانی مبارک احمد کیس میں پنجاب حکومت کی نظرثانی کی درخواست سماعت کے لیے مقرر
مظاہرین آبپارہ سے جلوس کی صورت میں ڈی چوک پہنچے، جہاں مظاہرے نے جلسہ عام کی شکل اختیار کرلی۔
مظاہرے میں اسلام آباد، راولپنڈی، مری، ٹیکسلا، حسن ابدال، اٹک، روات، گوجرخان، جہلم، دینہ اور دیگر کئی علاقوں سے بڑے بڑے قافلوں نے شرکت کی۔ جبکہ مختلف تاجر تنظیموں کے قائدین بھی ہزاروں تاجروں کے ہمراہ مظاہرے میں شامل ہوئے۔
سپریم کورٹ متنازعہ اور شریعت و آئین کے خلاف فیصلہ واپس لے، مظاہرین کا مطالبہ
مظاہرین نے سپریم کورٹ سے متنازعہ اور شریعت و آئین کے خلاف فیصلہ فی الفور واپس لینے کا مطالبہ کیا۔
مقررین نے ختم نبوت اور ناموس رسالتؐ کے حوالے سے قوانین میں کسی قسم کی تبدیلی کو ناقابل قبول قرار دیا اور کہاکہ سپریم کورٹ کا فیصلہ پاکستان میں ڈی اسلامائزیشن کی کوشش ہے جو قطعاً قابل برداشت نہیں۔
مقررین نے کہاکہ پاکستان میں قادیانیوں کو چور راستے سے ارتدادی سرگرمیاں جاری رکھنے کی اجازت نہیں دی جاسکتی۔
مظاہرے سے عظمیٰ گل اور دیگر کا خطاب
مظاہرے سے جماعت اسلامی کے رہنما میاں محمد اسلم، جمعیت اہلحدیث کے مرکزی رہنما سید عتیق الرحمان شاہ، مفتی اویس عزیز، تاجر رہنما شرجیل میر، کاشف چوہدری، ارشد اعوان، عظمیٰ گل اور دیگر نے خطاب کیا۔
یہ بھی پڑھیں چیف جسٹس کیخلاف قتل کی دھمکی؛ انسداد دہشتگردی ایکٹ کے تحت ٹی ایل پی رہنما کیخلاف مقدمہ درج
اس کے علاوہ مولانا قاری سیف اللہ سیفی، جمعیت علما اسلام کے امیر مولانا عبدالمجید ہزاروی، اہلسنت والجماعت کے رہنما مولانا تنویر عالم، ایم ایس او کے رہنما مولانا بلال ربانی، مولانا خلیل بندھانی سکھر، پیر عبدالشکور نقشبندی، مولانا تنویر علوی، عمار یاسر اور دیگر نے بھی خطاب کیا۔
مقررین نے کہاکہ 7 ستمبر کو مینار پاکستان لاہور کے جلسے میں آئندہ کے لائحہ عمل کا اعلان کیا جائے گا۔
