نامور بالی ووڈ اداکار امیتابھ بچن اور جیا بچن کا شمار فلم نگری کے کامیاب ترین ازدواجی جوڑوں میں ہوتا ہے لیکن اس پرفیکٹ جوڑی کے تعلق کے بارے میں مداح ہمیشہ متجسس رہتے ہیں کہ ان کے درمیان محبت کا تعلق کیسے پروان چڑھا۔
سوشل میڈیا پر جیا بپن کی ایک پرانی ویڈیو گردش کر رہی ہے جس میں وہ اور امیتابھ بچن سن 1998 میں اداکارہ سمی گریوال کے پروگرام میں بطور مہمان شریک ہوئے۔
پروگرام کے دوران اس جوڑے نے اپنی زندگی کے مختلف موضوعات پر گفتگو کی لیکن دونوں اداکاروں کے مابین رومانس پر جیا بچن کا تبصرہ سن کر مداح حیران رہ گئے۔
دورانِ انٹرویو میزبان نے اداکار امیتابھ بچن سے سوال کیا کہ کیا وہ خود کو رومانٹک انسان سمجھتے ہیں؟ جس پر امیتابھ بچن نے فوراً جواب دیا ’نہیں‘
اسی دوران جیا بچن نے طنزیہ انداز میں کہا ’ نہیں، ایسا نہیں ہے، امیتابھ صرف ان کے ساتھ ہی اَن رومانٹک ہیں۔‘
تنازعہ بن جانے کے ڈر سے امیتابھ بچن نے فوراً کہا کہ لگتا ہے انہوں نے گڑبڑ کردی ہے۔ امیتابھ کی بات پر جیا بچن نے قہقہہ لگاتے ہوئے گفتگو کا رُخ دوسری جانب موڑ دیا۔
واضح رہے کہ اس سے پہلے کئی مقامات پر دونوں اداکاروں کو نجی زندگی پر حیران کردینے والے انکشافات کرتے سنا جاچکا ہے۔ اداکاری کے بے تاج بادشاہ امیتابھ بچن اور جیا بچن کی شادی 3 جون 1973 کو ممبئی میں ہوئی تھی جس کے بعد اب بھی دونوں کی شادی کی تصاویر اکثر سوشل میڈیا پر دکھائی دیتی ہیں۔
