وزیر اطلاعات و نشریات عظمیٰ بخاری نے کہا ہے کہ فیک پارٹی، فیک ویڈیو اور فیک تصاویر پر جلسے کی مشہوری کر رہی ہے، انہیں جلسے کے لیے بندے نہیں مل رہے ہیں۔
اتوار کو لاہور میں پریس کانفرنس کے بعد الگ سے جاری اپنے ایک بیان میں عظمیٰ بخاری نے کہا کہ پاکستان تحریک انصاف (پی ٹی آئی) کے رہنما لوگوں کی تعداد کو بڑھا چڑھا کر پیش کر رہے ہیں۔ اصل حقیقت تو یہ ہے کہ ان کو جلسے کے لیے لوگ نہیں مل رہے ہیں۔
عظمیٰ بخاری نے مزید کہا کہ اطلاعات ہیں کہ پنجاب سے پی ٹی آئی کی قیادت لوگ لے کر جلسے میں جانے کے لیے تیار نہیں ہے۔ پنجاب کی تمام سڑکیں خالی ہیں۔ عارف علوی نے جنید اکبر کے نام سے 14 اگست کی ویڈیو شیئر کی ہے۔ 14 اگست کی شیئر کی گئی ویڈیو کشمیرکی ہے۔
انہوں نے کہا کہ حالت ایسی ہے کہ عارف علوی کو بھی نمبر بنانے کے لیے پرانی ویڈیوز شیئر کرنی پڑ رہی ہیں۔ شہبازگل اور اس جماعت کے یو ٹیوبراگست کی ویڈیو، تصاویر شیئر کر رہے ہیں۔
