نگران وزیراعلیٰ پنجاب محسن نقوی نے’رمضان المبارک سپورٹس سیریز‘ کی منظوری دے دی۔
نگران وزیراعلیٰ پنجاب محسن نقوی کی زیرصدارت خصوصی اعلیٰ سطحی اجلاس ہوا جس میں صوبائی وزیر اطلاعات عامر میر، مشیر برائے کھیل وہاب ریاض، چیف سیکرٹری، سیکرٹری اسپورٹس، سیکرٹری اطلاعات، کمشنر لاہور، ڈی سی لاہور، ڈی جی اسپورٹس اور دیگر متعلقہ حکام نے اجلاس میں شرکت کی۔
اجلاس میں بریفنگ میں بتایا گیا کہ ’رمضان المبارک سپورٹس سیریز‘ میں فٹبال، ٹیبل ٹینس، بیڈمنٹن، ہاکی، کبڈی اورکرکٹ کے مقابلے ہوں گے، مقابلوں میں پنجاب بھر کے 9ڈویژنز کی ٹیمیں حصہ لیں گی، سپورٹس مقابلے سپانسرڈ ہوں گے، سرکاری فنڈز خرچ نہیں کیا جائے گا۔
’رمضان المبارک سپورٹس سیریز‘ میں ونر ٹیموں کو 85لاکھ روپے کے انعامات دیئے جائیں گے، کرکٹ، ہاکی، کبڈی، بیڈمنٹن، فٹبال اورٹیبل ٹینس کے ونرکو 2،2لاکھ روپے کیش پرائز دیا جائے گا، ہاکی کے مقابلے منی ہاکی سٹیڈیم میں 7سے 11اپریل تک روزانہ رات کو منعقد ہوں گے، فٹبال اور کبڈی کے مقابلے پنجاب فٹبال سٹیڈیم،ٹیبل ٹینس کے مقابلے اسپورٹس جمنیزیم میں ہوں گے۔
بیڈمنٹن کے مقابلے انٹرنیشنل جمنیزیم ہال اورکرکٹ کے مقابلے ایل سی سی اے کرکٹ گراؤنڈ میں منعقد ہوں گے، رمضان اسپورٹس مقابلوں میں 57ٹیموں کے 903کھلاڑی اور آفیشلز شرکت کریں گے۔
اس موقع ہر اجلاس میں گفتگو کرتے ہوئے نگران وزیر اعلیٰ پنجاب محسن نقوی نے کہا کہ کھیلوں کا فروغ حکومت پنجاب کی ترجیحات میں سرفہرست ہے، کھیل کے مقابلوں میں زیادہ سے زیادہ نوجوانوں کو شرکت کے مواقع فراہم کیے جائیں گے، نوجوانوں کو کھیل کی طرف راغب کر کے ان کی صلاحیتوں کو جلابخشنا چاہتے ہیں۔
