عالمی شہرت یافتہ عالم دین اور مبلغ ڈاکٹر ذاکر نائیک نے کہا ہے کہ آئندہ ماہ اکتوبر میں پاکستان آؤں گا۔ کراچی، لاہور اور اسلام آباد میں لیکچرز دوں گا۔ 5 اور6 اکتوبر کو کراچی، 12 اور 13 اکتوبر کو لاہور جبکہ 19 اور 20 اکتوبر کو اسلام آباد میں لیکچر دوں گا۔
ڈاکٹر ذاکر نائیک نے یوٹیوب چینل پر Ask Dr Zakir کے نام سے آن لائن پروگرام میں گفتگو کرتے ہوئے پاکستان آنے سے متعلق سوالات کا جواب دیتے ہوئے انہوں نے کہا کہ ان شا اللہ میں اکتوبر 2024 میں حکومتی دعوت پر پاکستان آؤں گا جہاں کراچی، لاہور اور اسلام آباد میں لیکچرز کا سلسلہ ہوگا۔
مزید پڑھیں:مذہبی اسکالر ڈاکٹر ذاکر نائیک کا اگلے ماہ دورہِ پاکستان کا اعلان
انہوں نے کہا کہ مجھے پاکستان کی مختلف جامعات اور مختلف شہروں سے بہت سی درخواستیں اور دعوتیں موصول ہوئی ہیں لیکن وقت کی کمی کے باعث سب کو قبول کرنا ممکن نہیں، کیونکہ دعوتیں سینکڑوں کی تعداد میں ہیں جن میں روزانہ اضافہ ہورہا ہے، ان شا اللہ ہم ان میں سے کچھ اہم جامعات کا انتخاب کریں گے۔ ایک یونیورسٹی کو ہم منتخب کرچکے ہیں جو نیشنل یونیورسٹی آف سائنس اینڈ ٹیکنالوجی (نسٹ) اسلام آباد ہے۔
ان کا کہنا تھا کہ مجھے پچھلی کئی دہائیوں میں سب سے زیادہ جو دعوت نامے موصول ہوئے وہ پاکستان سے تھے، بالآخر یہ میرا پاکستان کا پہلا آفیشل دورہ ہے۔ اس سے پہلے 1991 میں ڈاکٹر اسرار احمد سے ملنے پاکستان گیا تھا۔ پاکستان آنا میرا دیرینہ خواب تھا، اللہ سے دعا کرتا ہوں کہ یہ ایک کامیاب دورہ ثابت ہو جس سے ان شا اللہ لوگوں کو بھی اور مجھے بھی فائدہ ہو۔ لیکچرز اردو اور انگریزی دونوں زبانوں میں ہوں گے۔
