پاکستان تحریک انصاف (پی ٹی آئی) کے چیئرمین بیرسٹر گوہر خان نے کہا ہے کہ زبردستی ووٹ لینے کے لیے ارکان قومی اسمبلی کو اٹھانے کا سلسلہ بند ہونا چاہیے۔
یہ بھی پڑھیں: راستہ نہیں نکالا تو ملک تباہ ہو جائے گا، بیرسٹر گوہر
اسلام آباد میں میڈیا سے گفتگو کرتے ہوئے انہوں نے کہا کہ سختیاں ختم کرنا ہوں گی، ایک دوسرے کے گریبانوں سے ہاتھوں نکالنے ہوں گے، ایک سمت میں جانا ہوگا، خودمختاری اور امن یقینی بنانا ہوگا، اگر آپ ایسا نہیں کریں گے اور ایک 70 فیصد عوامی حمایت والی سیاسی جماعت کو جگہ نہیں دیں گے، اس کے ارکان قومی اسمبلی سے ووٹ لینے کے لیے انہیں اٹھائیں گے تو آپ غیرسیاسی قوتوں کو اجازت دیں گے، اس عمل سے انتہاپسند عناصر کی حوصلہ افزائی ہوگی، اس لیے یہ ختم ہونا چاہیے۔
ہمارے بندے غائب ہیں۔ ہمیں عدلیہ کو سپورٹ کرنا ہے۔ جلسوں میں سرکاری وسائل استعمال کرنا جھوٹا الزام ہے۔ بیرسٹر گوہر خان pic.twitter.com/JkR7EYAGaa
— WE News (@WENewsPk) September 23, 2024
بانی پی ٹی آئی عمران خان کو عدالت کی جانب سے ریلیف ملنے کے حوالے سے سوال کے جواب میں انہوں نے کہا کہ عمران خان کو سپریم کورٹ کے احکامات کے بعد مقدمات میں فائدہ ہورہا ہے لیکن بانی پی ٹی آئی نے کہا تھا کہ وہ یہ ذاتی فائدے کے لیے نہیں چاہ رہے بلکہ جو لوگ کرپشن میں ملوث ہیں ان کے خلاف مقدمات ہونے چاہئیں۔ بیرسٹر گوہر نے کہا کہ ہمارے خلاف کرپشن کا کوئی کیس نہیں، صرف اختیارات کے غلط استعمال کے مقدمات ہیں، ہم عدلیہ سے امید لگائے بیٹھے ہیں، یہ عدلیہ کا امتحان ہے، دیکھتے ہیں کہ وہ اس امتحان میں عوام کی امنگوں پر کس حد تک پورا اترتی ہے۔
