مقبوضہ کشمیر پر غیرقانونی بھارتی قبضے کے 77 برس مکمل ہونے پر قومی اسمبلی میں یوم سیاہ کی قرارداد متفقہ طور پر منظور کرلی گئی ہے۔
قومی اسمبلی میں قرارداد وزیر امور کشمیر انجینئر امیر مقام نے پیش کی۔ قرارداد کے متن میں لکھا گیا ہے کہ ایوان کشمیری عوام کے ناقابل انتقال حق خودارادیت کے حصول کی جدوجہد میں پاکستان کی سفارتی، اخلاقی اور سیاسی حمایت کا اعادہ کرتا ہے اور اس بات پر زور دیتا ہے کہ جنوبی ایشیا میں پائیدار امن اور استحکام تنازعہ جموں و کشمیر کے اقوام متحدہ کی سیکیورٹی کونسل کی قرادادوں اور کشمیری عوام کی امنگوں کے مطابق حتمی حل پر منحصر ہے۔
یہ بھی پڑھیں: مقبوضہ کشمیر کی ریاستی حیثیت کی بحالی کی درخواست، بھارتی سپریم کورٹ سماعت پر رضامند
قرارداد کے متن کے مطابق، ایوان بھارت کے غیرقانونی زیرتسلط جموں و کشمیر کی بین الاقوامی سطح پر تسلیم کردہ متنازعہ حیثیت اور اس کے آبادیاتی ڈھانچے اور سیاسی منظرنامے کو تبدیل کرنے کی بھارت کی مسلسل کارروائیوں کو مسترد کرنے کا اعادہ کرتا ہے، اس کے علاوہ ہزاروں سیاسی کارکنوں کی طویل عرصے سے نظربندی اور کئی کشمیری سیاسی جماعتوں پر پابندی کی مذمت کرتا ہے۔
قرارداد میں کہا گیا کہ ایوان اس بات کی نشاندہی کرتا ہے کہ مقبوضہ جموں و کشمیر میں لوک سبها يا قانون ساز اسمبلی کے انتخابات جموں و کشمیر کے عوام کے حق خوداردیت کا متبادل نہیں سکتے، ایوان بہادر کشمیری عوام کو زبر دست خراج تحسین پیش کرتا ہے، جنہوں نے اپنے حق خود ارادیت کے حصول کے ضمن میں گزشتہ 77 برسوں کے دوران ان گنت قربانیاں دیں۔
یہ بھی پڑھیں: فلسطین اور مقبوضہ کشمیر میں جاری جرائم انسانیت کی سنگین ترین خلاف ورزی ہیں، پاکستان
قرارداد میں مطالبہ کیا گیا ہے کہ بھارت مقبوضہ جموں و کشمیر میں انسانی حقوق کی صورتحال کو بہتر بنائے، تمام کشمیری سیاسی قیدیوں کو رہا کرے، کالعدم قرار دی گئی سیاسی جماعتوں پر پابندی ختم کرے، ہنگامی اور انسداد دہشتگردی کے سفاک قوانین کو منسوخ کرے اور جموں و کشمیر کے حوالے سے اقوام متحدہ کی سلامتی کونسل کی متعلقہ قراردادوں پر مخلصانہ عملدرآمد کرے۔
