امریکا میں رشوت ستانی اور دھوکہ دہی کے الزامات کے بعد بھارتی ارب پتی صنعتکار گوتم اڈانی کی کاروباری ساکھ کو ایک دھچکا لگا ہے، کینیا نے اڈانی گروپ کے ساتھ ملٹی ملین ڈالر کے ہوائی اڈے کی توسیع اور توانائی کے معاہدے منسوخ کردیے ہیں۔
کینیا کے صدر ولیم روٹو نے قوم سے خطاب میں کہا کہ یہ فیصلہ ان کی قومی تحقیقاتی ایجنسیوں اور شراکت دار ممالک کی جانب سے فراہم کردہ نئی معلومات کی بنیاد پر کیا گیا ہے، انہوں نے اس ضمن میں امریکا کا کوئی تذکرہ نہیں کیا۔
یہ بھی پڑھیں: 265 ملین ڈالرز رشوت کا الزام، بھارتی ارب پتی گوتم اڈانی پر امریکا میں فرد جرم عائد
واضح رہے کہ بھارتی صنعتکار کا اڈانی گروپ کینیا کے ساتھ ایک معاہدے پر دستخط کرنے کے عمل میں شامل تھا، جس کے تحت دارالحکومت نیروبی کے مرکزی ہوائی اڈے کو جدید خطوط پر استوار کرنا تھا۔
دنیا کے 20 امیر ترین افراد میں شمار کیے جانیوالے گوتم اڈانی کے اڈانی گروپ کو مجوزہ معاہدے کے تحت نیروبی ایئرپورٹ پر ایک اضافی رن وے اور ٹرمینل تعمیر کرنے کے عوض ایئرپورٹ کو 30 سال تک چلانے کے حقوق حاصل ہونا تھے۔
مزید پڑھیں: بھارتی اڈانی گروپ ناروے کے سرمایہ کاری کے فنڈ سے خارج
اڈانی گروپ کو مشرقی افریقہ کا کاروباری مرکز سمجھے جانے والے ملک کینیا میں بجلی کی ٹرانسمیشن لائنوں کی تعمیر کا معاہدہ بھی دیا گیا تھا، تاہم ایئرپورٹ کی تعمیر سے متعلق مجوزہ معاہدے پر گروپ کیخلاف کینیا میں مظاہرے ہوئے تھے۔
نیروبی ایئرپورٹ کے ملازمین نے ہڑتال کرتے ہوئے موقف اپنایا تھا کہ مجوزہ معاہدے کے باعث حالات مزید خراب ہوں گے اور بعض صورتوں میں نوکریوں کے خاتمے کا بھی اندیشہ ہوگا۔
مزید پڑھیں: گوتم اڈانی بی جے پی حکومت میں ارب پتی کیسے بن گیا؟ راہول گاندھی
توانائی کے وزیر اوپیو ونڈائی نے کینیا کی ایک پارلیمانی کمیٹی کو بتایا کہ اس معاہدے پر دستخط کرنے میں کینیا کی جانب سے کسی رشوت یا بدعنوانی کا عنصر شامل نہیں تھا۔
واضح رہے کہ بھارتی صنعت کار اور اڈانی گروپ کے بانی گوتم اڈانی اور 7 دیگر افراد، بشمول ان کے بھتیجے ساگر اڈانی پر 2 روز قبل نیویارک میں ہندوستان میں شمسی توانائی کے منصوبوں سے متعلق مبینہ رشوت ستانی اور سیکورٹیز فراڈ کے سنگین الزامات میں فرد جرم عائد کی گئی ہے۔
مزید پڑھیں: جولائی 2024 میں ایشیا کا امیر ترین آدمی کون؟
استغاثہ کے مطابق، 62 سالہ گوتم اڈانی اور کمپنی کے دیگر عہدیداروں نے شمسی توانائی کے ٹھیکے حاصل کرنے کے لیے بھارتی حکومت کے اہلکاروں کو 265 ملین ڈالر سے زائد رشوت دینے کی سازش کی تھی، ان معاہدوں سے 20 سالوں میں تقریباً 2 بلین ڈالر منافع حاصل کرنے کا تخمینہ لگایا گیا تھا۔
