افغانستان کے صوبہ غزنی میں 2 مسافر بسوں کو حادثات پیش آئے ہیں جس کے نتیجے میں 52 افراد ہلاک اور 65 زخمی ہوگئے ہیں۔
یہ بھی پڑھیں طورخم حادثہ: امدادی سرگرمیاں 80 فیصد مکمل، آخری لاش بھی برآمد
غیرملکی میڈیا رپورٹس کے مطابق صوبہ غزنی میں کابل قندھار ہائی وے پر یہ حادثات پیش آئے، پہلا حادثہ شہباز گاؤں کے قریب اس وقت پیش آیا جب ایک بس آئل ٹینکر سے ٹکرا گئی، جبکہ دوسری بس کو حادثہ مشرقی ضلع اندار میں پیش آیا۔
طالبان حکومت نے تصدیق کی ہے کہ وسطی افغانستان میں ایک ہائی وے پر ایندھن کے ٹینکر اور ٹرک کے درمیان 2 جان لیوا بس حادثات کے نتیجے میں 52 افراد ہلاک اور 65 زخمی ہوئے ہیں۔
افغان حکومت کے ترجمان ذبیح اللہ نے بتایا کہ کابل قندھار ہائی وے پر 2 مہلک ٹریفک حادثات ہوئے، جن میں ہمارے 52 شہری ہلاک اور 65 دیگر زخمی ہوگئے ہیں۔
یہ بھی پڑھیں شمالی وزیرستان میں ٹریفک حادثہ: پاک فوج نے بروقت ریسکیو آپریشن کرکے قیمتی جانیں بچالیں
طالبان حکومت کے مطابق ٹریفک حادثات کی وجوہات کا پتا لگانے کے لیے تحقیقات شروع کردی گئی ہیں، حادثے میں زخمی کچھ افراد کی حالت تشویشناک ہے، جنہیں طبی امداد کے لیے اسپتال منتقل کردیا گیا ہے۔
