پاکستان کرکٹ بورڈ (پی سی بی) نے ویسٹ انڈیز کے خلاف 17 سے 21 جنوری اور 25 سے 29 جنوری تک ملتان میں کھیلے جانے والے آئی سی سی ورلڈ ٹیسٹ چیمپیئن شپ کے 2 ٹیسٹ میچوں کے لیے 15 رکنی اسکواڈ کا اعلان کردیا ہے۔
یہ بھی پڑھیں:ویسٹ انڈیز کی ٹیسٹ سیریز کے لیے 19 سال بعد پاکستان آمد
جنوبی افریقہ کا دورہ کرنے والی 15 رکنی ٹیسٹ ٹیم میں 7 تبدیلیاں کی گئی ہیں۔ برقرار کھلاڑیوں میں شان مسعود (کپتان)، سعود شکیل (نائب کپتان)، بابر اعظم، کامران غلام، خرم شہزاد، محمد رضوان، نعمان علی اور سلمان علی آغا شامل ہیں۔
اسپن بولنگ ڈپارٹمنٹ کو مضبوط بنانے کے لیے آف اسپنر ساجد خان اور پراسرار اسپنر ابرار احمد کو بائیں ہاتھ کے اسپنر نعمان علی کے ساتھ واپس ٹیم میں شامل کر لیا گیا ہے۔ زخمی صائم ایوب اور آؤٹ آف فارم عبداللہ شفیق کی جگہ اوپنرز امام الحق اور محمد ہریرہ کو بھی ٹیم میں شامل کیا گیا ہے۔
مزید پڑھیں:پاکستان بمقابلہ ویسٹ انڈیز ٹیسٹ سیریز، ٹکٹوں کی فروخت کب شروع ہوگی؟
ورک لوڈ مینجمنٹ کے حصے کے طور پر عامر جمال، محمد عباس، میر حمزہ اور نسیم شاہ کو آرام دیا گیا ہے۔ ان کی جگہ سلیکٹرز نے خرم شہزاد کو ٹیم میں برقرار رکھا ہے، محمد علی اور کاشف علی کو بھی ٹیم میں شامل کیا گیا ہے۔
کیپ ٹاؤن ٹیسٹ کے دوران دائیں ہاتھ میں انجری کا شکار ہونے والے وکٹ کیپر بلے باز حسیب اللہ کی غیر موجودگی میں پاکستان انڈر 19 اور شاہینز کے سابق کپتان روحیل نذیر کو بھی اسکواڈ میں شامل کیا گیا ہے۔
ویسٹ انڈیز کے خلاف پہلے ٹیسٹ کے لیے پاکستانی اسکواڈ
شان مسعود (کپتان)، سعود شکیل (نائب کپتان)، ابرار احمد، بابر اعظم، امام الحق، کامران غلام، کاشف علی، خرم شہزاد، محمد علی، محمد ہریرہ، محمد رضوان (وکٹ کیپراور بیٹر)، نعمان علی، روحیل نذیر (وکٹ کیپر اور بیٹر)، ساجد خان اور سلمان علی آغا شامل ہیں۔
