وفاقی حکومت نے تحریک انصاف سے مذاکرات کے لیے پہلا باضابطہ رابطہ کرلیا ہے۔
تحریک انصاف کی 3 رکنی کمیٹی کو مذاکرات کی دعوت دیدی گئی ہے۔ وزیراعظم شہباز شریف کی ہدایت پر وفاقی وزیر قانون اعظم نذیر تارڑ نے تحریک انصاف کے رہنما علی ظفر سے رابطہ کیا اور انہیں مذاکرات کی باقاعدہ دعوت دی۔
ذرائع کے مطابق حکومت اور تحریک انصاف کے درمیان مذاکرات کا پہلا دور شام 6بجے پارلیمنٹ ہاؤس میں ہوگا۔
تحریک انصاف کی 3 رکنی کمیٹی اور حکومت کے درمیان مذاکرات پارلیمنٹ ہاؤس کمیٹی روم نمبر 3 میں ہوں گے۔ واضح رہے کہ جمعیت علمائے اسلام نے مذاکرات میں شریک نہ ہونے کا فیصلہ کیا ہے۔
اس سے قبل وفاقی حکومت چیئرمین سینیٹ صادق سنجرانی سے رابطہ کیا تھا اور ان سے مذاکرات کے آغاز کے لیے سہولت کاری کی درخواست کی تھی۔ بعدازاں چیئرمین سینیٹ نے قائد ایوان اسحاق ڈار اور قائد حزب اختلاف ڈاکٹر شہزاد وسیم کے نام ایک خط لکھا اور ان سے مذاکراتی کمیٹی کے لیے ارکان کے نام طلب کیے تھے۔
