میٹا کی زیرِ ملکیت مقبول میسجنگ ایپ واٹس ایپ نے اپنے اینڈرائیڈ صارفین کے لیے ایک نیا اور کارآمد فیچر متعارف کرا دیا ہے، جس کے تحت اب چیٹ اور چینلز میں براہِ راست ترجمہ کیا جا سکے گا۔ یہ فیچر فی الحال واٹس ایپ بیٹا ورژن 2.25.12.25 استعمال کرنے والے مخصوص اینڈرائیڈ صارفین کے لیے دستیاب ہے، جب کہ جلد ہی اسے عام صارفین کے لیے بھی متعارف کرایا جائے گا۔
نیا فیچر صارفین کو اسپینش، عربی، پرتگالی، ہندی اور روسی زبانوں میں لکھے گئے پیغامات کا ترجمہ براہ راست ایپ کے اندر کرنے کی سہولت فراہم کرتا ہے۔ دلچسپ بات یہ ہے کہ یہ ترجمہ آن ڈیوائس یعنی فون پر ہی مکمل ہوتا ہے، اس کے لیے انٹرنیٹ کنیکشن درکار نہیں ہوگا۔
مزید پڑھیں: وٹس ایپ نے ایموجی ری ایکشنز انٹر فیس میں دلچسپ تبدیلیاں کردیں
صارفین کو اس سہولت کے استعمال کے لیے پہلے مخصوص زبانوں کے پیک ڈاؤن لوڈ کرنے ہوں گے، جو الگ الگ یا کثیر لسانی ڈیٹیکشن پیک کی شکل میں دستیاب ہیں۔ ترجمہ کا آپشن چیٹ انفارمیشن اسکرین پر ایک ٹوگل کی صورت میں موجود ہوگا، جسے انفرادی اور گروپ چیٹس دونوں میں فعال کیا جا سکے گا۔
اس کے علاوہ، صارفین کسی بھی مخصوص پیغام پر لانگ پریس کرکے ’ Translate ‘ آپشن منتخب کرکے فوری طور پر اس کا ترجمہ بھی کر سکیں گے۔ اگرچہ یہ آن ڈیوائس ترجمہ فیچر کلاؤڈ بیسڈ سروسز جتنی درستگی فراہم نہیں کرتا، تاہم واٹس ایپ نے صارفین سے فیڈبیک کی درخواست کی ہے تاکہ اس فیچر کو مزید بہتر بنایا جا سکے۔ کمپنی نے یہ بھی واضح کیا ہے کہ صارفین کی پرائیویسی کے تحفظ کے پیش نظر پیغامات کا مواد میٹا کو نہیں بھیجا جائے گا۔
بیٹا ورژن استعمال کرنے والے صارفین سے کہا گیا ہے کہ وہ اس فیچر کا بھرپور تجربہ کریں اور اپنی رائے شیئر کریں تاکہ حتمی ریلیز سے قبل اس میں مزید بہتری لائی جا سکے۔
