وزیراعظم محمد شہباز شریف نے جنوبی ایشیا میں امن و امان کی موجودہ صورتحال میں پاکستان کی حمایت پر صدر طیب ایردوان کا شکریہ ادا کرتے ہوئے کہا ہے کہ ہم غیر جانبدار عالمی تحقیقات میں ترکیہ کی شمولیت کا خیر مقدم کریں گے۔
یہ بھی پڑھیں: پہلگام واقعہ: سوئٹزر لینڈ کے بعد یونان نے بھی پاکستان کی تجویز کی حمایت کردی
وزیراعظم ہاؤس میں ملاقات کے لیے آئے ترک سفیر ڈاکٹر عرفان نیزیروغلو سے گفتگو کرتے ہوئے شہباز شریف نے کہا کہ پہلگام واقعہ کے بعد بھارت کی اشتعال انگیز کارروائیوں کے باوجود پاکستان کا ردعمل ذمہ دارانہ رہا ہے۔
شہباز شریف نے کہا کہ ترکی کی جانب سے پاکستان کی حمایت دونوں ممالک کے درمیان تاریخی، گہرے اور وقت کی آزمائش پر مبنی برادرانہ تعلقات کی عکاس ہے۔
وزیر اعظم نے کہا کہ ہندوستان کوئی ثبوت دینے میں ناکام رہا ہے اور وہ پاکستان کو پہلگام واقعہ سے جوڑنے کی جھوٹی کوشش کر رہا ہے۔
اس موقعے پر ترک سفیر نے کہا کہ ترکیہ پاکستانی موقف کا حامی ہے۔ انہوں نے پاکستان کے ساتھ اپنی یکجہتی کا اظہار کرتے ہوئے خطے میں کشیدگی کو کم کرنے اور جنوبی ایشیا میں امن و سلامتی کو برقرار رکھنے کے لیے موجودہ بحران میں تحمل سے کام لینے پر زور دیا۔
