بلوچستان کے علاقے قلات میں ہندوستان کی جارحیت، مساجد پر حملوں اور معصوم شہریوں کی ہلاکتوں کے خلاف سیاسی، سماجی، قبائلی رہنماؤں اور طلباء کی جانب سے احتجاجی ریلی نکالی گئی۔
ریلی کے شرکاء نے شہر کی مختلف سڑکوں پر مارچ کیا، ہندوستان کے خلاف شدید نعرے بازی کی اور پاک فوج زندہ باد کے نعرے لگائے۔ ریلی میں ڈپٹی کمشنر جمیل احمدبلوچ ایڈیشنل ڈپٹی کمشنر شاہنواز بلوچ اور اسسٹنٹ کمشنر آفتاب احمدلاسی سمیت علماء کرام، ہندو برادری اور عوام بڑی تعداد میں شریک ہوئے۔
یہ بھی پڑھیں: قلات میں ہندوستان کی آبی جارحیت کے خلاف ریلی کا انعقاد
ریلی کے شرکاء نے ہاتھوں میں بھارتی جارحیت کے خلاف بینرز اور پلے کارڈز اٹھا رکھے تھے جبکہ بھارت کے خلاف اور پاک فوج کے حق میں زبردست نعرے بازی کی گئی۔
مظاہرین نے بھارت کی حالیہ کارروائیوں میں معصوم شہریوں کی شہادت اور مساجد پرحملوں کی شدید مذمت کرتے ہوئے عالمی برادری سے مطالبہ کیا کہ وہ بھارتی مظالم کا نوٹس لے اور جنوبی ایشیا میں امن و استحکام کے لیے اپنا کردار ادا کرے۔
ریلی کے شرکاء نے کہا کہ پاک فوج ہر جارحیت کا ڈٹ کر مقابلہ کرنے کے لیے تیار ہے اور بھارت کی کسی بھی مہم جوئی کا بھرپور جواب دیا جائے گا۔
