ایران پر اسرائیلی حملوں کے بعد پیدا ہونے والی کشیدہ صورتِ حال کے باعث اسرائیلی وزیراعظم نیتن یاہو نے اپنے بیٹے ایوینرن نیتن یاہو کی شادی کی تقریب ملتوی کردی۔
اسرائیلی میڈیا کے مطابق ایوینرن اور ان کی منگیتر امیت یار دینی کی شادی 16 جون کو تل ابیب کے معروف مقام رونیت فارم میں ہونا طے تھی، تاہم خطے میں بڑھتے تناؤ اور فوجی کارروائیوں کے باعث یہ تقریب تاخیر کا شکار ہو گئی ہے۔
یہ بھی پڑھیں ایران کا اسرائیل کے خلاف ’آپریشن وعدہ صادق سوم‘ جاری، میزائل حملوں میں 4 اسرائیلی ہلاک
میڈیا رپورٹس کے مطابق اسرائیلی حملے سے قبل وزیراعظم نیتن یاہو نے دیوارِ گریہ پر جا کر خصوصی دعا بھی کی تھی۔ بعد ازاں اسرائیلی فورسز نے تہران، تبریز، ہمدان، لورستان اور کرمان شاہ میں میزائل حملے کیے، جن میں60 سے زیادہ افراد شہید ہوئے، جن میں20 بچے بھی شامل تھے۔ تہران میں ایک 14 منزلہ رہائشی عمارت مکمل طور پر تباہ ہو گئی۔
ایرانی حکومت کے مطابق ان حملوں میں جوہری سائنسدانوں سمیت پاسدارانِ انقلاب کے اہلکار بھی شہید ہوئے ہیں۔
ایران نے ان کارروائیوں کے ردعمل میں ’آپریشن وعدہ صادق سوم‘ کے تحت200 سے زیادہ بیلسٹک میزائل داغ کر اسرائیل کو منہ توڑ جواب دیا ہے۔
دوسری جانب امریکی سینیٹر برنی سینڈرز نے اسرائیلی حملے کو غیر قانونی قرار دیتے ہوئے کہا کہ امریکا کو اسرائیل کی کسی نئی جنگ کا حصہ نہیں بننا چاہیے۔ نیتن یاہو نے امن مذاکرات سبوتاژ کر کے ہزاروں جانیں خطرے میں ڈال دی ہیں۔
یہ بھی پڑھیں ایرانی فوج کا ایک اور اسرائیلی ایف 35 جہاز گرانے اور پائلٹ کی گرفتاری کا دعویٰ
برنی سینڈرز کے مطابق ایران کے جوہری پروگرام پر مذاکرات اتوار کے روز طے تھے، جنہیں اسرائیلی حملے نے ناکام بنا دیا۔
