چنگان پاکستان نے اپنی مشہور سیڈان گاڑی ’السِوِن‘ کے تمام ماڈلز پر ایک خصوصی آفر متعارف کرائی ہے، جس کے تحت صارفین کو 2 لاکھ 75 ہزار روپے تک کی مجموعی بچت دی جا رہی ہے۔ کمپنی کے مطابق یہ آفر 30 جون 2025 تک محدود ہے یا جب تک اسٹاک دستیاب ہے۔
چنگان کی جانب سے جاری اعلامیے کے مطابق یہ بچت 2 حصوں پر مشتمل ہے۔ ڈیڑھ لاکھ روپے کی فوری رعایت جو گاڑی کی قیمت پر دی جا رہی ہے اور سوا لاکھ روپے مالیت کی مفت پیریاڈک مینٹیننس سروس، جو 2 سال تک جاری رہے گی۔
یہ آفر چنگان السوِن کے تمام ویریئنٹس، بشمول 1.3L اور 1.5L آٹومیٹک ماڈلز پر دستیاب ہے۔ نئی رعایتی قیمت کے تحت السِوِن کی ابتدائی قیمت 39 لاکھ 49 ہزار روپے سے شروع ہو رہی ہے، جو پرانی قیمت 40 لاکھ 99 ہزار روپے سے نمایاں طور پر کم ہے۔
2 سالہ سروس میں کیا شامل ہے؟
2 سالہ مفت پیریاڈک مینٹیننس پیکج میں انجن آئل، آئل فلٹر، ایئر فلٹر، کار واش، اور دیگر بنیادی سروسز شامل ہوں گی، جنہیں مخصوص وقفوں پر چنگان کے مستند سروس سینٹرز سے کروایا جا سکے گا۔
صارفین کے تاثرات
صارفین کی جانب سے گاڑی کے بارے میں ملے جلے ردعمل سامنے آئے ہیں۔ کچھ صارفین کا کہنا ہے کہ مینٹیننس کی اوسط لاگت قریباً 8 سے 10 ہزار روپے فی چکر آتی ہے، اس لیے 2 سال کی مفت سروس حقیقی بچت فراہم کرتی ہے۔ تاہم کچھ صارفین نے پینٹ کے معیار اور 2021 ماڈلز میں گیئر شفٹنگ کے حوالے سے تحفظات کا اظہار بھی کیا ہے۔
پارٹس اور ری سیل مارکیٹ
چنگان کے پرزہ جات بڑے شہروں میں باآسانی دستیاب ہیں، لیکن گاڑی کی ری سیل قدر اب تک دیگر جاپانی برانڈز کے مقابلے میں نسبتاً کم دیکھی گئی ہے۔ کمپنی کے مطابق وہ اپنے نیٹ ورک اور اعتماد کو مزید مضبوط بنانے پر کام کر رہے ہیں۔
ڈیلرشپ اور بکنگ
اس خصوصی پیشکش سے فائدہ اٹھانے کے لیے صارفین کو قریبی چنگان ڈیلر شپ سے فوری رابطہ کرنے کی ہدایت کی گئی ہے، کیونکہ اسٹاک محدود ہے اور یہ آفر صرف مختصر مدت کے لیے ہے۔
نوٹ: یہ آفر مخصوص شرائط و ضوابط سے مشروط ہے۔ مزید تفصیلات کے لیے چنگان کی ویب سائٹ یا مقامی ڈیلرشپ سے رجوع کیا جاسکتا ہے۔
